VIDEO Qaqortoq ujakkaarluni unammersuarnissamut aputeqarluassangatippaat
Qaqortumi Sisoraatinik Arpattartut Peqatigiiffiat, QSAP, unammersuarnermi marsip 26-ani aallartittussani ingerlatsisuussapput.
- Maani mittarfeqannginnatta immaqa ikinnerulaat tikinnissaat ilimagisinnaavarput. Mittarfeqartuugutta amerlanerungaartut tikinnissaat ilimanaraluarpoq, Anguteeraq Høegh-Olsen QSAP-meersoq oqarpoq.
Kujataanulli unammiarnissaq kajumissaatigaa.
- Tassa unammigiartussanut oqarusuppunga: unammigiarniaritsi Qaqortumut, løjpe nutaaq, kujataanullu. Nunarput ataasiuvoq aamma apillaqqittorujussuuvoq kujataa.
- Ilaatigut isumaqaramik kujataa apineq ajortoq kisianni taamaannginnami, massakkunaasiit qannerpugut, aamma aputigeqaagut, Anguteeraq Høegh-Olsen oqarpoq.
QSAP-mi ilaasortat 40-t missaat unammersuarnermut peqataanissaat naatsorsuutigaa, marsilli aallartilaarnerani aatsaat unammersuarnermi qassit peqataassanersut paasinarsissaaq.