Qanorooq suli allagartalersorneqarsinnaanngitsoq
- Tamanna soorunami ajuusaarutigingaarparput. Atortorissaarutit atortullu nutaat aaqqissuullugit ulloq unnuarlu ulappuppugut, kisiannili soorunami unammillernartoqarpoq. Uanilu atortut suleriutsillu nutaat aallakaatitassiat allagartalersorniarnerannut unammillernarput, nutaarsiassaqartitsivimmi pisortaq, Mikkel Bjarnø Lund oqarpoq.
KNR-ip aallakaatitat ataatigut allagartalersorlugit nalunaaqutaq unnukkut qulinut aallakaatinneqaqqittalernissaanut suli ullut arlaliusinnaanissaat naatsorsuutigaa.
- Soorunami inuinnaat naalakkersuisooqataanerannut pisussaaffigaarput nunatsinniittut tamarmik politikkikkut inuiaqatigiinnilu ineriartornermi malinnaasinnaanissaat. Tamanna nutaarsiassat qitiuffigeqataaffigaat. Nunatsinniittut tamarmik malinnaasinnaanngoqqinnissaannut pisinnaasarput tamaat suliaqarpugut, sapaatip akunnerani matumani tamatuma aaqqinnissaa naatsorsuutigaarput, nutaarsiassaqartitsivimmi pisortaq oqarpoq.
