Qangatut sikoqqajaavoq
Qeqertarsuup tunuata sikugaluttualernera pissutigalugu nunaqarfinnut umiarsuit ingerlaarunnaarput. Siorna akerlerluinnaanik pisoqarpoq. Siornami sikunianngeruttormat 2010-mi juullikkunni Upernavimmi nunaqarfiit avannarlersaat Kullorsuaq umiarsuarmit tikinneqarpoq.
Maanna Qeqertarsuup tunuamiut qanga pissutsit qanoq ittarsimanerannik eqqaasinneqarput, taamanikkummi qaammatini arlalinni imaq sikuinnarsuusarpoq.
- Ukiut 15-it kingulliit qaqutigorsuaannaq Qeqertarsuup tunua ukiormannatut sikuniartigisarpoq, siku pillugu DMIp alapernaarsuiviani siku pillugu siunnersorti Martin Nissen dmi.dk-mut oqarpoq.
Qeqertarsuup tunua suli sikuissunngilaq, taamaattoq ilimanarseqqajaavoq qangatut sikusinnaanera.
- Ukiormanna taama pisoqarsinnaalluarpoq taamatut Kalaallit Nunaat issiinnassappat, Martin Nissen oqarpoq.
Tamanna pissutigalugu DMIp Qeqertarsuup tunuani sikunik alapernaarsuinini annertusivaa siku aalisarnermut imaatigullu angallannermut pingaaruteqarluinnarmat.