Qamuteralaat atorlugit tuttunik malersuisimanermik takunnittunik politiit oqaloqateqarput
Poul Petersen Sermersuup politiivineersoq nalunaarpoq, angutit sisamat qamuteralannik snescooterinik Qooqquni sapaatiummat tuttunik malersuisut politiinit oqaloqatigineqarsimasut maannalu takunnittunik oqaloqateqarneq ingerlanneqartoq.
Takunnittunit paasissutissat pissarsiarineqartut, politiit inatsisilerituuinit nalilersorneqassapput tassanngaanniillu angutit sisamat pineqaatissinneqassanersut aalajangiiffigineqassasoq, Poul Petersen oqarpoq.
Aamma atuaruk Angutit sisamat qamuteralaat snescooterit atorlugit tuttunik malersuisut imaanullu qimaatillugit
Angallat Qooqquni aqisserniariartunik aqqaneq marlunnik ilaasoqartoq arfininngornermi unnukkut Qooqqunut tikippoq. Sapaammi ullaakkut angallammut ilaasut gummibådinik Qooqqunut ikaassorneqarneranni angutit sisamat snescooterit marluk atorlugit tuttunik malersuisut takuneqarput.
Qooqquni tuttunik malersuisoqarnerani takunnittut ilaat, radioaviisimit attavigineqartut oqarput, Qooqqunut tikinnerminni tuttut 30nit 50inut amerlatigisut takusimallugit - taakkunannga pingasut immamiittut takuneqarput taakkua nunamut qaqiniartillugit qimminit tatamiiaartinneqarput, takunnittut ilaat radioaviisimut taama oqaluttarput.