Qallunaatsiaat illukuinik nassaartoqartoq
Ole Guldager aamma Lasse Meyer, Narsarsuarmi Nanortalimmilu katersugaasivinni aqutsisuusut, Tasersuarmi Tasermiut eqqaaniittumi septembarimi alapernaarsuillutillu uuttortaasimapput, tassangalu atatillugu illunik nalunaarsorneqarsimanngitsunik ujartuisimallutik.
Savaatillik sumiiffimmi immikkut ilisimannittut peqataasimasut, Lasse Meyer tusagassiuutinut allappoq.
- Illukut nalunaarsorneqarsimanngitsut nassaaraagut, taakkulu aamma GPS-kkut nalunaarsorneqarput titartarneqarlutillu. Paasissutissat suliarineqareerpata Nunatta Katersugaasivianut nassiunneqassapput kingornalu nunatta oqaluttuarisaaneranik paasissutissanik katersivimmut ilanngunneqassallutik, Meyer allappoq.
Pinngortitaq nungusaasoq
Illukut alapernaarneqartut nungusaajartortut qanoq inneri Nunatta Katersugaasivianit nalilersorneqassapput
Naasorissaaviusimasoq pinngortitamit nungusaagaluttualersoq aamma siumorneqarsimavoq.
Alapernaarsuinermi, Gitz-ip aningaasaateqarfianit aningaasalerneqarsimasumi, illukut ilaai tikikkuminaassimapput nassaariuminaallutillu, allallu pinngortitami nungasaagaluttualersimallutik.
- Taamaammat piffissaagallartillugu paasissutissanik aallerfiginissaat pingaaruteqarpoq. Tassami ilisimasanik nutaanik pissarsiffigineqarsinnaapput Qallunaatsiaammi Nunatta kujataani angalasimanerat paasisaqarfigineqarsinnaammat, Lasse Meyer allapoq.