Qallunaat nunap sajunnerani ajoqusersimanngillat
Nepalimi marlunngormat nunap sajunnerata kingorna Danmarkimi innuttaasut tamaaniittut tamarmik ajunngitsut nalunaarutigineqarpoq.
Danmarkimi innuttaasut maanna Nepalimiittut 101-it attaveqarfigineqareersut ajunngitsullu paasinarsisoq, Danmarkimi Nunanut allanut tunngasunut ministereqarfiup innuttaasunut sullissiviata ilisimatitsissutigaa.
Nepalimi apriilip 25-anni nunap sajunnerata kingorna Danmarkimi innuttaasut attaveqarfiginiarnerat taamaalilluni maanna sukkanerusumik iluatsitsiffiuvoq.
Nepalimi siullermik nuna sajummat Danmarkimi innuttaasunut attaveqarniarneq Nunanut Allanut tunngasunut ministereqarfiup sullissivianit ajornarkusoortinneqarpoq, tassami Danmarkimi innuttaasut Nepalimiinnerminnik nalunaaruteqarsimanngitsut amerlaqimmata.
Qallunaalli amerlaqisut apriilip 25-ata kingornagut Nepalimit qimagutereermata suliaq maanna ajornannginnerulerpoq.
Nepalimi nuna ippassaani (marlunngormat) ullaakkut Nunatta nalunaaqutaa naapertorlugu tallimat qaangilaaraa kingullermik sajuppoq, aseruatiternernillu aamma kinguneqarluni.
Nepalimi inuit 76-it Indiamilu 17-it ajunaartut nalunaarutigineqarpoq, nunallu sajutttarneranut uuttuut naapertorlugu nuna 7,3-mik sajulluni. Nepalimi apriilip 25-anni nuna sajummat 7,9-mik uuttorneqarpoq.