Qalerallit mikisut Qasigiannguani suliffinnik ikinnerulersitsisut

Qalerallit ukioq manna pisarineqartut siorna piffissap taamaalinerani pisarineqartunut naleqqiullugit affaat sinnilaaginnarlugit pisarineqarsimasut, aviisip Sermitsiap sapaatit akunnerata siuliani allaaseraa.

Qaleralinniarnerlu ukiuni kingullerni allanngoriartorsimasoq Royal Greenlandimit malugaat.

- Ukiuni kingullerni tulaanneqartartut milliartorsimasut maluginiarsimavarput. Taamaalillutalu tunisassioriaaseq alla ingerlattariaqalersimallugu, Royal Greenlandip attaveqarnermut sulisoqarnermullu pisortaa, Jens K. Lyberth oqarpoq.

AAMMA ATUARUK Qalerallit ikinnerat suliffeqarfissuarnut sunniivoq

Qalerallillu milliartornerat ikiliartornerallu Qasigiannguani suliffissuarmut kinguneqartoq, taanna oqarpoq.

- Tulaassat amerlanerugallarmata, ullukkut ukioq naangajallugu tunisassiortoqartarpoq, taavalu ukiup ilaani, aamma unnukkut tunisassiortoqartarluni. Tunisassiat ikilinerisigut unnukkorsiortut ukioq manna ingerlasinnaasimanngillat, Jens K. Lyberth oqarpoq.

Qalerallilli ikiliartorneranni saarulliit amerliartorput. Taamaammat Qasigiannguani suliffissuarmi ullukkut sulisut qaleralinnik suliaqarnermik saniatigut saarullinnik suliaqarsinnaapput.

AAMMA ATUARUK Avannaani qaleralinniarneq ajalusooratarsinnaasoq

Saarulliillu Qasigiannguani suliffeqartitsigaluarlutik qaleralinnut naleqqiullugit ikinnerusunik isertitsissutaapput.

- Ajoraluartumillu isertitagut annikillippata taamatut ineriartortitsinissamut aningaasaliissutigisinnaasagut killeqarnerulerlutik, Royal Greenlandip attaveqarnermut sulisoqarnermullu pisortaa, Jens K. Lyberth oqarpoq.

Qeqertarsuup Tunuani siunissami qaleralinniarsinnaaginnarnissaq qulakkeerniarlugu aalisarnermi peqataasut qanoq pilersaarnermik nalunaarummut apriilimi atsiorput.

AAMMA ATUARUK Ikilinerannut peqqutaasorineqartoq isumaqatigiinngissutigineqartoq