Qalerallit ikinnerat suliffeqarfissuarnut sunniivoq

Qalerallit nunatta avannaani, ingammillu Qeqertarsuup Tunuani, pisarineqartut ikilerujussuarnerat Qeqertarsuup Tunuani suliffissuarnut kinguneqarpoq.
Assi © : Forsvaret
aggustip 14-at 2017 15:29

Qalerallit ikilisimasut Halibut Greenlandimit Royal Greenlandimiillu maluginiarsimavaat. Pisarineqartullu minneruleriartuinnarput.

Taamaattoqarneralu suliffissuarnut kinguneqarpoq. KNR Halibut Greenlandip pisortaanut, Niels Thomsenimut, attaveqarmat, taanna aviisimut Sermitsiamut, tallimanngormat saqqummersumut apersorneqarnermini oqaatigisaminut innersuussivoq.

- Siornatigutut amerlatigisunik pisaqartoqassaarpoq, tamassumalu ingerlatsinerput sunnerpaa, Thomsen aviisimut oqarpoq. Sunniutilli soraarsitsinernik kinguneqassanersut taassuma aviisimut oqaatigerusunngilaa.

AAMMA ATUARUK Ikilinerannut peqqutaasorineqartoq isumaqatigiinngissutigineqartoq

Qalerallit ingammik Qeqertarsuup Tunuani qangalili ikiliartorsimasut, Royal Greenlandimit oqarput. Pisarineqartulli ukioq manna ikilerujussuarnerat ajornerulersitsivoq.

Aalisartut ilaat tunitsivinnut allanut tulaassisalernerat, qalerallillu milligaluttuinnarnerat, ingerlatseqatigiffiup Qasigiannguani nioqqutissiorneranut kinguneqarput.

- Qasigiannguani qaleralinnik nioqqutissiornerput millisittariaqarsimavarput, ilaatigut unnukkut sulisoqartarunnaarluni, attaveqarnermut sulisoqarnermullu pisortaq Jens K. Lyberth KNR-imut oqarpoq.

AAMMA ATUARUK Avannaani qaleralinniarneq ajalusooratarsinnaasoq

Qalerallit ikiliartorneranni saarulliit Qeqertarsuup Tunuani pisarineqartut amerlanerulerput. Taamaammat Halibut Greenlandip Royal Greenlandillu suliffissuatik saarullinnik tisaffiusinnaasunngortinniarlugit naleqqussarpaat.

KNR aalisarnermut piniarnermullu naalakkersuisumut, Karl-Kristian Krusemut, attaveqarniarsarigaluarpoq, taannali piniarmat iluatsinngilaq.