Qaleralittassat killilersorneqalissapput
Avannaani qaleralinniarneq killilersuiffigineqartariaqalissasoq, inatsisartut ippassaq ataatsimiinneranni partiinit tamanit oqariartuutigineqarpoq, sumiiffiillu ilaanni aalisakkeriviit imassaqartannginnerat aamma oqaatigineqarluni.
Inatsisartunut ilaasortap Siumumeersup Doris Jakobsen-ip qaleralinniarnerup oqaluuserineqanissaa pillugu inatsisartuni oqallittoqarnissaanik siunnersuutaa ippassaq sivisuumik inatsisartuni oqaluuserineqarpoq.
Doris Jakobsen partiinilu allani oqaaseqartut oqarput, pingaartumik Ilulissat eqqaani qaleralittassani pisarineqartut 4000.tonsinik sinnerneqarsimaneri eqqarsarnartoqartoq, aammalu qalerallit milliartorneri pinngortitaleriffimmiit saqqummiunneqartoq eqqarsarnartoqartillugu.
Aalisarnermut Naalakkersuisoq Simon Olsen oqarpoq, qaleralinniarneq arlaatigut killilersuiffigineqalissasoq, piujuartitsinissaq eqqarsaatigalugu. Tamatumalu suliffinnik annaasaqarfiusussaanera,isertitallu ikileriartussaanerat aamma piareersimaffigineqarnissaat oqariartuutinut ilaavoq.
