Qaleralinnik assartuineq qamuteralaat atorlugit ukiormanna ingerlaqqissaaq
- Aalisarut pisaannik sikup sinaanit qamuteralammik assartuineq aalisartut sivisunerusumik aalisarfimmiissinnaanerannik periarfissiivoq. Sapaatip akunnera tikillugu illuaqqani unnuisinnaapput taamasillutillu pisat annertunerujussuit pisarisinnaanngorlugit, tamannalu aamma ukioq naallugu Royal Greenlandip tunisassiorfiani suliassaqartitsinnaanermik pilersitsivoq, Royal Greenlandimi aalisarnermut siunnersorti Therkel Mathiassen Royal Greenlandip nittartagaanut taama oqarpoq.
Royal Greenlandip suliffissuani ukiuunera ataavarnerusumik suliassaqartitsinissaa aamma naatsorsuutigineqarpoq. Aaqqissuussineq assingusoq siorna iluatsilluartumik misilinneqarsimavoq.
- Siorna aaqqissuussineq iluatsilluarpoq aalisartut 20-it 30-illu akornanni amerlassuseqartut sikumi aalisarnermi qalerallit 100 tonsit missingi tulaappaat. Qimussimik aalisarfimmiit Ilulissanut uteqattaarlutik pisaminnik tunisisarnerminni 30 tonsit missingi tunisaramikkit pisanik qamuteralannik assartuisarneq annertunerujussuarmik isertitaqassutigisinnaavaat, Therkel Mathiassen oqarpoq, nangipporlu:
- Siorna pisanik qamuteralannik assartuisinnaanermut akuersissut aatsaat februarip naajartornerani tunniunneqarpoq, akuersissummilli tunisineq kingusinaarunneqarsimammat ukioq siusinneruskkut piareersarismavugut taammattumillu maanna tassa aalisartut sikumi pisaannik qamuteralannik assartuineq aallarteriaannaavoq.
Qamuteralaat nunakkut aalajangersimasukkut ingerlaarfeqarlutik aammalu nunakkuinnaq ingerlaarlutik assartuisarnissaannik piumasaqaateqarnikkut kangerlummi nunarsuarmi kingornussassat pillugit UNESCO-p allattugaataaniittup timaatigut qamuteralaat ingerlaarsinnaanerat akuerineqarpoq.
