Kisitsisit nutaat ersersitsipput: Qaleralinniarneq ajorsiartuinnartoq

Qeqertarsuup Tunuani qaleralinniarneq maannakkut nuanninngilaq. Ukiuni arlaqalersuni qaleralittat amerliartoriarlutik maanna appariartuinnalersimasut takussutissaqangaatsiarpoq.

Sinerissap qanittuani umiatsiaararsorlutik aalisartut ukiumut pisassiissutinit 4100 tonsiusunit 2115 tonsiinnai aggustip naanerani pisarisimagaat, GFLK-mit kisitsisit kingulliit takutippaat. Tamanna siorna piffissami taamaalisukkut pisanut sanilliukkaanni umiatsiaararsorlutik aalisartut 3672 tonsinik tunisaqarsimapput

Tamatuma 1500 tonsimik appariarnera, Qeqertarsuup Tunuani umiatsiaararsortorpassuit misigaat.

AAMMA ATUARUK Avannaani qaleralinniarneq ajalusooratarsinnaasoq

Qalerallit tulaanneqartartut appariaateqarnerat Uummannami Upernavimmilu ingerlatsiviit aamma malugisimagaat. Taamaakkaluartorli Qeqertarsuup Tunuani ikileriarneratulli annertutiginngitsoq, GFLK paasissutissiivoq.

KNR-ip Sermitsiallu Qeqertarsuup Tunuani ajornartorsiutaasut aasaq manna oqaluttuarisinnaasimavaat. Appariartornerat kommunit nunattalu karsiisa malugaat, taakkunani qaleralinnut akitsuutinit isertitakinneruneq malugineqarpoq.

Naalli qaleraallit? Tamannalu isumaqatigiinngissutigineqangaatsiarpoq.

Sinerissap qanittuani aalisartut piniartullu kattuffiata piffimmi tassani kiassutsip allanngornera appariaateqanngaatsiarnermut peqqutaasoraa.

- Immap kissassusaa pissutaavoq. Kissarnerulersimaneranit qalerallit timmissallumi allamiilersimapput, SQAPK-mit Erik Lange oqarpoq.

Pinngortitaleriffimmeersulli, Rasmus Nygaardip, tamanna isumaqatigivallaanngilaa, allanik peqquteqarsinnaasorigamiuk.

- Qalerallit avannaaniillutillu kujataaniipput, taamaammat immap kissassusaata gradimik ataatsimik marlunnilluunniit allanngornera amerlassusaanut allannguisuusorinngilara, Rasmus Nygaard KNR-imut oqarpoq.

AAMMA ATUARUK Qalerallit ikilinerat kommunip malugigai

AAMMA ATUARUK Ikilinerannut peqqutaasorineqartoq isumaqatigiinngissutigineqartoq