Qalasersuarmi Sikuiuitsumilu Kujallermi aatsaat taama sikuunngitsigisoq
Qalasersuup nalaani Sikuiuitsumilu kujallermi ukiup taamaalinerani sikusarneranut naleqqiullugu aatsaat taama sikuunngitsigaaq.
Ilisimatuut amerikamiut pingasunngornermi taama ilisimatitsipput.
- Issittup sikuata issunerpaaffissani marsip qaammataani angusussaagaluarpaa. marsilli arfineq-aappaani aatsaat taama sikuunngitsigivoq, amerikamiut avataarsuanik misissuisoqarfiat NASA, qaammataasat atorlugit ukiuni kingullerni 38-ni sikumik uuttorsaasimasoq taama allappoq.
Matumunnga peqatigitillugu, USA-p apummik sikumillu nuna tamakkerlugu misissuisoqarfiata NSIDC-p kisitsisaataani takuneqarsinnaavoq Sikuiuitsumi kujallermi ukiup taamaalinerani aatsaat taama sikuunngitsiginera uuttortarneqarsimasoq.
Imaata sikua milliartorpoq, tamatumalu peqatigisaanik silap kiassusia ukiuni tulleriinni pingasuni aatsaat taama qaffasitsigaluni.
Nunarsuup silaannaata kissatsikkaluttuinnarnerata uuliamillu ikummateqarnerup millisinneqartariaqarnera ilisimatuut isumakulunnartoqartippaat.
Issittup imaartaani siku ukiup ingerlanerani piffissani assigiinngitsuni alliartorlunilu milliartortarpoq. Sikunerpaaffik marsimi anguneqartarpoq septembarimilu minnerpaaffimminiittarluni.
Issittup imartaata sikuata annertunerpaaffigisartagaa 1979-imiilli ukiut qulikkuutaarlugit 2,8 procentinik milliartorsimasoq, NASA ilisimatitsivoq.
- Septembarimi aatsaat taama sikunngitsigivoq imaannaallunilu, Walt Meier, NASA-mi ilisimatooq taama oarpoq.
- Oktobarimi novembarillu aallartinnerani arriitsuararsuarmik sikujartulersoq takusinnaavarput, imarmi kiannerusoq siammartereerpat aatsaat sikujartulersinnaammat.
- Kingusissupilussuakkut sikujartulerpoq tamatumalu kingorna sorpassuit arriinnerumik ingerlapput. Sikujartornera arriitsuaraavoq, ilisimatooq oqarpoq.
Sikuiuitsumi kujallip imartaata sikua ukiup qanoq ilinera apeqqutaalluni aamma allanngorartuuvoq. Septembarimi sikuunerpaaffissani angusarpaa februaarillu nalaani minnerpaaffissaq anguneqartarluni.
- Sikuiuitsup kujalliup imartaata sikuunera, piffissamut uuttortaaffiusimasumut naleqqiullugu novembarimiilli ullut tamaasa minnerpaaffimmiittarpoq, NASA tusagassiorfinnut nalunaaruteqarluni taama allappoq.
/ritzau/AFP
