Qaasuitsup Kommuniani inissitat ikiliartortut
- Taakkua sulilluarnerisigut meeqqat ulloq unnuarlu angerlarsimaffinnut inissinneqartartut ikiliartuaalersimapput massakkut. Ukioq kingulleq eqqarsaatigalugut illoqarfik ataaseq eqqarsaatigalugu arfinillit angerlarnikuupput, tamakkiisumillu arfineq pingasut qulillu akornanni angerlarnikuullutik, Johanne Olsen taama oqarpoq.
Sapaatip akunnerni kingullerni Kommuneqarfik Sermersuumi angerlarsimaffiup avataanut inissitat aningaasartuutillu amerliartorneri KNR-miit tusarliuttarpagut, kommuninulli marlunni ineriartorneq assigiinngitsunik ingerlavoq. Qaasuitsup Kommunianimi meeqqanut inuusuttunullu ikiorsiisarnermut 81 million koruunit atorneqassasut missingersuutaavoq Kommuneqarfik Sermersuumilu 188,5 million koruunit missingersuutaasut 4,4 million koruuninik ilaneqarnissaat akuerineqareerluni.
Aamma atuaruk Meeqqanut inuusuttuaqqallu inissinneqartunut aningaarsartuuterpassuit
Ilaqutariillu illui pilersinneqarnikut peqqutaallutik meeqqat angerlarsimaffiup avataanut inissinneqartartut qaasuitsup kommunianni ikiliartornerannut peqqutaasut ilagivaat.
- Ilaqutariit illua pilersikkaangatsigu sulisoqartarpugut ilaqutariinnut siunnersuisut, tassani illumi aamma sulisorisarpagut pitsaaliuisut miljøarbejderillu, Johanne Olsen oqarpoq.
Isumaginninnermut Naalakkersuisup ullaap tungaa KNR-mut oqarpoq meeqqanut inuusuttunullu tunngasunut suliniutissat ilarissagaat ilaqutariit angerlarsimaffiannut ornigulluni tapersersuineq ingerlanneqartarnissaa.
Aamma atuaruk Martha Lund Olsen: Isumaginninnermik sulialinnit ilaqutariit pulaarneqartalissapput
Tamannalu qaasuitsup kommuniani ingerlanneqareersoq meeqqanut ingerlatsivimmi pisortap oqaatigaa.
- Maani ilaqutariinnut siunnersortit illoqarfipput Ilulissat eqqarsaatigissagutsigu anillutik ilaqutariit ornittarpaat angerlarsimaffiinut suleqatigalugillu, aamma illoqarfinni allani taamatut sulineq ingerlavoq, Qaasuitsup Kommuniani Meeqqanut, inuusuttunut, ilaqutariinnut pinaveersaartitinermullu ingerlatsivimmi pisortaq Johanne Olsen taama oqarpoq.
Qaasuitsup Kommuniani uummannaq minillugu illoqarfinni tamani ilaqutariit illuinik pilersitsisoqareerpoq.
