Qaasuitsup Kommuniani aningaasatigut aaqqitassat arlaqartut
Takussutissat taakkua aviisip AG-ip allagaatinik takunnissinnaatitaanermit pissarsiarisimasai maanilu radioaviisimi oqaluttuarisimasatsinnit pisut.
Tamakkuli aaqqinniarneqalerput, Qaasuitsup kommuniani pisortaaneq kommunaldirektør Hans Eriksen oqarpoq.
Naatsorsuutinit kukkunersiukkat arlaqartut kommunalbestyrelsemi ilaasortanut februaarip qaammataata naalernerani saqqummiunneqarnerisa kingorna Qaasuitsup Kommuniani suliassat arlaqarput.
Suliassat misissorneqartussat ilai 2012-mit pisuupput.
Qaasuitsup kommuniani pisortaanerup Hans Eriksenip oqarnera malillugu ajornartorsiutit arlaqartut kommunip maanna ajornartorsitigisai, kommunit 2009-mi kattussuunneri sioqullugit aallaaveqartut.
Aamma atuaruk Qaasuitsup Kommuniani kukkusumik ilaatigut akissarsisitsisoqartarsimavoq
- Qaasuitsup kommunia angisoorsuuvoq taavalu inoqarfiusut avinngarusimasumiillutik taamaattumillu nakkutilliineq ajornaatsuinnaasarsimanngilaq, kommunaldirektør Hans Eriksen oqarpoq,
- sumiiffiit tamaasa ataatsikkut misissuiffigissallugit ajornakusoorlutik, kommunaldirektøri oqarpoq.
Kommunemi ajornartorsiutigineqartunut ilaavoq kommunemi atorfillit ilinniarsimanngitsut ilinniarsimasutut kukkusumik akissarsitinneqarsimammata.
- Kommunip tapiissutit innutaasunut tunniuttagai sumiiffinni assigiinngitsuni kukkuneqartarsimapput.
Hans Eriksenip oqarnera malillugu kommunimit malinnaaffigineqarput iluarsiniarneqarlutillu.
Immikkoortortaqarfinnili allani aamma ajornartorsiuteqarpoq.
- Isumaginninnermut tunngassuteqartuni naapertuilluartumik agguaassinissamut maleruagassat amigaatigineqarsimapput, taakkuuppullu maannakkut suliarineqaleruttorput, naatsorsuutigaarput apriilip ingerlanerani maleruagassiorsinnaassallutigit , Hans Eriksen taama oqarpoq.
Iliuusissanik siusinnerusukkut sooq aallartitsisoqarsimannginnersoq Hans Eriksen aperineqarami ima oqarpoq.
- Ajornartorsiutigineqartut uani pineqartut naatsorsuiffinnut ukiunut assigiinngitsunut tunngasuupput, kukkussutigineqartullu tassaapput revisionip uparuartugai akissutit, ukiukkaarlugit ingerlateqqinneqartarsimannginnerat, taamaattumik taakkua anigorumallugit ataatsimut massakkut akineqarput, pilersaarusiorneqarlutillu, Qaasuitsup kommuniani kommunaldirektør Hans Eriksen taama oqarpoq.
Qaasuitsup kommuniani iliuusissat 2015-ip qeqqata missaani naammassineqarnissaat siunniunneqarpoq.