Qaasuitsup Kommunia avinneqaruni kommuninngortut akiitsoqareerlutik aallartissapput
- Qaasuitsup Kommunia pilersinneqarami, GrønlandsBankenimit 140 millionit koruuninik taarsigassarsilluni aallartippoq. Taakkulu akilersorneri aatsaat maanna aallarteruttorlugit, borgmesteri oqarpoq.
Taassuma ukiortaami oqaaseqaammini ilaatigut eqqaavaa, kommunimi innuttaasut siorna taasitinneqarnerisa kinguneranik kommunip avinneqarnissaa, kommunalbestyrelsip sukumiisumik upernaap tungaanut suliassaasa pingaarnersarissagaat. Tamanna pissalluni Naalakkersuisooqatigiilersut kommunip avinneqarnissaanik isumaqatigiissutaat tunngavigalugu.
Ole Dorphilli eqqaamaqquaa, kommuni avinneqaruni kommuninngortut akiitsoqareerlutik aallartittariaqassasut.
- Taama aallartittariaqassapput kommunalbestyrelsi oqanngippat, akiligassat sinneri maanna akilerneqarnissaannik. Kommunalbestyrelsilu taamaaliunngippat tassa kommuninngortussat nutaat aningaaserivimmut akiligassaqarlutik aallartittussaapput. Tamannalu artukkiissaaq taamaattumiguna kommunip avinneqarnissaanut pifffissaq sukumiisumik atortariaqartoq, kommuninngortussat iluamik aallartissappata, Ole Dorph oqarpoq, kommunilli avinneqarnissaanut siunniussaq sukumiisumik kommunimiit suleqataaffiginiarlugu aamma oqarluni.
- Suliassaq annertuvoq taamaattumiguna oqartunga suliaq tamanna sukimiisumik suliarigaanni aatsaat pitsaasumik angusaqartoqarsinnaasoq. Tassami imaaginnanngilaq, tassa kommuni avipparput eqqarsarlutalu suna tamarmi tassa aaqqittoq. Taama ajornaatsiginnginnguatsiarpoq. Qaasuitsup Kommuniani borgmesteri, Ole Dorph taama oqarpoq.
