Qaarnersuarmit eqqorneqarnissaq ilimananngilaq

Asiami siorna malimmik qaarnersuaqarnerata kingunerisaanik, Danmarkimi tamakkuninnga ilisimasalinnik suleqatigiissitaliortoqarpoq. Naalagaaffeqatigiinnerup iluani qaarnersuarmik eqqorneqarsinnaanissamik aarlerinaateqartoqarnersoq suleqatigiissitaliap misissorpaa.

Nalunaarutaat DMI-mi ullumi saqqummersinneqarpoq, nunarpullu qaarnersuarmik eqqorneqarsinnaanissaa ilimanaateqarujussuanngitsoq nalunarusiami atuarneqarsinnaavoq.

- Aap, Kalaallit Nunaat qaarnersuarmik eqqorneqariaannaavoq, kisianni tamanna ilimanaateqarujussuanngilaq, Danmarkimi Kalaallit Nunaannilu ujarassiuutut misissuisartuneersoq, Søren Gregersen oqarpoq.

Nunarput qaarnersuarmik eqqorneqassagaluaruni, taava nunatta kangimut kujammut sineriaa eqqorneqarnissaa ilimanarnerusoq Søren Gregersen oqarpoq. Spaniap avataani immap naqqani nunap sajussinnaanissaa ilimanarsinnaammat Søren Gregersenip tamanna ilimagaa.

- Kisianni ukiut tuusintit ingerlanerini taamaattoqarnissaa ilimanaateqanngilaq, Søren Gregersen naqissusiivoq.