Qaannami katersuunnatik unammersuassapput

Nukittuneqqusaanneq Greenland Strongest siorna oktobarimi pisoq aallarniutaavoq sumiiffiit arlariit ataatsikkut atorlugit unammisitsinermut.

AAMMA ATUARUK Corona: Qaannat unammersuarnissaat taamaatinneqarpoq

Taamatut suleriuseqarluni unammersuartitsineq Arctic Sports Greenlandip naammasseqqammerpaa maannalu Qaannat kattuffiat tassunga sangusunut ilannguppoq.

Tassami sumiiffimmi ataasiinnarmi pinnatik sumiiffinni arlalinni unammisitsinikkut pissartanngorniuttoqassaaq.

- Ullumi corona pillugu allattoqarfimmiit ilisimatinneqarpugut Uummannami unammersuartitsinissamut qinnuteqaapput itigartinneqartoq, Qaannat kattuffianni siulersuisuni ilaasortaq Ungaaq Tobiassen KNR-mut oqarpoq.

Qaannat unammersuarnerat QU-mut naalisarneqartartoq julip qulingiluaaniit ulluni qulini ingerlassaaq.

Sila i akornusiissappat?

Itigartitsinermullu tunngaviuvoq nuna tamakkerlugu unammersuartitsinerit illoqarfinni aalajangersimasuni taamaallaat pisinnaanerat taakkunanilu Uummannaq ilaanngilaq.

Naalakkersuisut corona pillugu malittarisassiaat naapertorlugit ukunani taamaallaat unammersuartoqarsinnaavoq: Ilulissat, Aasiaat, Qasiannguit, Qeqertarsuaq, Kangerlussuaq, Maniitsoq, Sisimiut, Nuuk, Paamiut, Narsaq, Narsarsuaq aamma Qaqortoq.

- Taamaattumik pilersaarut tulleq aallartippoq. Unammersuarnermi peqataasut najugarisartik qimannagu unamminermi kinngusaarlutillu parruteqataassapput, Ungaaq Tobiassen nassuiaavoq.

- Uummannami peqatigiffik Qajaq suli aaqqissuisuussaaq taakkulu unammersuarnerit unammeriaatsini qulingiluaasuni pisut ataqatigiissassavaat, Ungaaq Tobiassen oqarpoq.

- Nalunngilarpulli sumiiffimmiit sumiiffimmut sila allanngorarsinnaasoq. Qanoq iliussavisi sumiiffiit arlaanni anorlerpallaassappat?

- Sumiiffinni peqatigiiffiit nalunnginnerusarpaat sumi qatsunganerunersoq, Ungaaq Tobiassen oqarpoq.