Qaanaami qaleralinniarneq aallartilluartoq
Arctic Green Foodip Qaanaami tunitsivia Royal Greenlandip ukioq ataaseq matuma siorna ingerlatarilerpaa, januaarillu qaammataani tunisinerup aallartinneranit maannamut qalerallit 108.557 kiilot tunineqarsimapput.
- Angusaq kusarnarluinnarput naammagisimaaqaarpullu, aallarteqqammerpugummi.
- Aamma januaarip qaammataani sikuppat Qaanaamit kilometerinik 70-inik ungasitsigisumi Qeqertani aalisarnermik aallartitsinissamik pilersaaruteqarpugut. Taava aalisarneq qanoq ingerlassanersoq takujumaarparput, Niels Ole Møller, Qeqertarsuup tunuanit Qaanaamut qaleralinnut tunngatillugu ingerlatsinermut pisortaq taama oqarpoq.
Qaanaami aalisartut 53-iusut ukiuunerani sikumit aalisarput.
Aappaagu aalisarnissaq Royal Greenlandip isumalluarfigisupilussuuaa, taamanikkussamummi tunisassiorneq pimoorullugu aallartisarneqassammat.