VIDEO Puigortunngortarneq pillugu Sisimiuni pikkorissaasoqaleruttorpoq

- Assorujussuaq pingaartippara, aamma ilaqutaasut pikkorissarneqarnissaminnut pisariaqartittaramikku, puigortunngortunik sullissisoq, Angerla Kruse, KNR-imut oqarpoq. 

Aamma atuaruk Puigortunngorneq pillugu filmiliaq qanigisaasut aallartippaat

Puigortunngortumullu qanigisaasuulluni imaannaanngitsuusinnaasoq ilaatigut aamma sammineqarpoq. Gitte Absalonsenip anaanaa ilisarinnissinnaajunnaarnikuuvoq, Gittelu puigortunngortunut ilaqutaasut siornatigut pikkorissartinneqarmata peqataasimavoq iluaqutigisaminik.

- Soorunami tupannartorujussuunikuuvoq angajoqqaarisaq taamaalisoq isigilerlugu. Taava taanna aallaavigalugu naapittarfimmik pilersitsinikuuvugut, imaajaaffigisinnaasatsinillu tamanna iluaqutigilluarpara, puigortumik ilaqutaasoq, Gitte Absalonsen, oqarpoq.

Aamma atuaruk Puiguttortut angerlarsimaffissaat Ilulissani sanalerpaat

Pikkorissartitsineq sinerissani sumiiffinni assigiinngitsuni ingerlanneqareerpoq, tamannalu iluatsilluartutut pikkorissaasumit nalilerneqarpoq.

- Oqartarput pissarsiaqarlutik. Imaakkami ukua puigortunngortut immikkorluinnaq qisuariartaramik taavalu nalugutsigit nuanniitsorujussuarmik inuuneqartissinnaallutigit, pikkorissaasoq, Rosa Marie Elsner, oqarpoq.

Nunatsinni puigortunngortut 250-it nalunaarsorneqarnikuupput, Rosa Marie Elsnerilli 500-t sinneqarsorai, nalunaarsorneqartut tamakkerneqarneq ajormata. 

Taseralimmi puigortunngornermik pikkorissartitsineq novembarip 25-ani tamanit ornigarneqarfigisinnaavoq.