Puigortunngorneq pillugu filmiliaq qanigisaasut aallartippaat
Allaaserisami siullermi eqqaaneqanngilaq filmip pilersinniarnera Nuummi qanigisaasut aningaasassarsissussimagaat. Arnat sisamat nappaammik qanimut misigisaqarsimasut Nuummi qanigisaasut peqatigiiffiannik aallartitsipput nappaat ilisimaneqarnerulersinniarlugu ukiuni kingullerni nunani tamalaani takussaagaluttuinnarmat.
- Qanigisaasuni tunngavissinniarsimavarput filmit pingasut suliarineqarnissaat, tassanilu tunuliaqutaraagut qanigisaasutut puigortunngorneq pillugu misigisarsimasagut. Taamaasilluta takutikkusussimavarput nappaat eqquigaangat qanoq iliortoqarsinnaanersoq. Uagummi nammineq nappaatip qanoq iliuuseqarfiginissaa nalornissutigisimavarput, misilittakkavullu taamatut migisisaqartunut ingerlateqqikkusuppagut, Nuummi qanigisaasuniit Malene M. Nielsen oqarpoq.
Malene Nielsen, Aviaja Rohman, Mikol Lyberth aamma Avijâja Absalonsen aningaasanik katersuiniarsimapput filmiliornermut atugassanik.
- Aningaasat aningaasaateqarfiit peqatigiiffiillu Danmarkimiittut Nunatsinniittullu, Namminersorlutik Oqartussat, kommuunit suliffeqarfiillu iluaqutigalugit katersorsimavagut. Kikkorpiaat tapersiisimanersut tusarliunnianngikkallarparput kisianni tapersiinerat qujamasuutigeqaarput, Malene Nielsen oqarpoq.
