Puiaasaq allagartalik nassaarineqarpoq

Carlap arfineq marlunnik ukiullip Nuumminngaaneersup puiaasaq allagartalerlugu Danmarkimi imaanut igitaa nassaarineqarpoq.

Kurtz Bentzen nulialu Jytte sulinngiffeqarlutik Danmarkimi Fynip kujataani qeqertami Ærømi feriarput. Ærømiit qeqertamut allamut mikinerusumut Birkholmimut ulluinnarlugu angalaarput.

Sissami pisuttuartillutik eqqumiitsumik nassaarput.

- Nualiara uannit siulliulaarluni pisuppoq pisorujoortillunilu ujaqqanik allanillu soqutiginarsinnaasunik nassaassartarpoq taakkualu ilagaat puuiaasaq. . Puiaasaq taanna allakkamik imaqarpoq. Taannalu Carlap allatarivaa.

Asasara kinaagaluarnersorluunniit arlaat. Uanga ateqarpunga Carla arfineq marlunnik ukioqarpunga Kalaallit Nunaannilu najugaqarpunga, puiaasami nassaarineqartumi taama allassimasoqarpoq.

Allakkami nassaarineqartumi uummataasanik aamma titartaasoqarsimavoq.

Kurt Bentzenip nuliatalu Carla attavigerusukkaluarpaat oqaluttuullugu puiaasaq imaanut igeriussimasaa nassaarineqarmat.

Kurt nulianilu attaveqatigiittarfimmi Facebookimi allapput, piffissallu sivikitsuinnaap ingerlanerani allataat 3900-eriarlugu delerneqarpoq.

Neriussimagaluarpunga Carla nassaarissallutigu sumilu feriarsimanersoq tusarlutigu.

Sulilu pissanganarneruvoq Kalaallit Nunaanninngaaneersuummat. Tassami ilisimaneqarsinnaanngilaq puiaasaq immami sumi igeriunneqarsimanersoq.

Akunnerit arfinillit qaangiummata Carlap ataataavanit Claus Johansenimit ilaqutaanniillu Nuummiittunit nalunaarut takkuppoq.

- Aluu Kurti, qujanaq nalunaaravit. Uanga Carlap ataatagivaanga. Qeqertaq Ærø ataasinngormat tikeraarparput, ikaartaammut ilaatilluta Carlap puiaasaq imaanut nakkartippaa neriulluni nunarsuarmi sumiikkaluarnersumi nassaarineqarumaartoq, qeqertaq Birkholm aamma nunarsuarmi qeqertat ilagaat, ajunnginnerpaamik kissaallusi Carla ilaqutaalu.

Tassalu puiaasaq sissami nassaarineqartoq kimit imaanut igeriunneqarsimanersoq paasineqarpoq.