Professori: Pituffimmut suliaq tunngasoq ajugaanavianngilaq
- Pituffimmi kiffartuussinissamut piumasaqaatit kiffartuussisussanngortumit, Exilis Servicesimit tamakkiisumik naammassineqarsimaneri eqqarsaatigalugit, danskit suliffeqarfiisa naammagittaalliuutaat amerikamiut naalagaaffiisa kukkunersiuisuinit isumaqatigineqarnissaat takorlooruminaappoq, Søren Friis Hansen finans.dk-mut oqarpoq.
Taanna aamma isumaqarpoq, kiffartuussisussarsiornermi piumasaqaatit allassimaneri naapertorlugit, kiffartuussisussanngortup Exilis Servicesip, amerikamiunit pigineqartup, danskit suliffeqarfiattut allattorsimaffiilersimanera pissutigalugu, taakku inatsisinik unioqqutitsisimanngitsutut isigineqarsinnaasut. Aamma kiffartuussisussanngortoq suliffeqarfissuarmit amerikamiunit ingerlanneqartumit Vectrusimit, taanna sakkussiornermik suliffeqarfiusoq pigineqaraluarpalluunniit apeqquserneqarsinnaanani.
Aamma atuaruk Pituffik pillugu siunnersuut akuerineqarpoq
Copenhagen Business Schoolimi inatsisilerituutut professorip, Søren Friis Hansenip taama isummersornera, Dansk Industrimit tupannartutut isigineqanngilaq.
Dansk Industrimi pisortat ilaata, Frank Billip oqarnera naapertorlugu, inatsisit ilisimatuussutsikkut aallaaveqanngillat, taamaattumillu amerikamiut naalagaaffiisa kukkunersiuisuisa, USA-p Danmarkillu akornanni illersornissakkut isumaqatigiissutaat eqqarsaatiginngitsoorsinnaanngikkaat erseqqissaatigalugu, tassami isumaqatigiissummi tassani allassimavoq, Pituffimmi kiffartuussisut tassaassasut danskit imaluunniit kalaallit suliffeqarfii.
Aamma atuaruk Olsvigip Lidegaardip Naalakkersuisullu Pituffik pillugu akissuteqarnissaat ujartorpaa
- Danmarkip USA-llu akornanni illersornissaq pillugu isumaqatigiissut, amerikamiut eqqartuussiviisa isiginngitsuusaasinnaanngilaat. Taamaattumillu naatsorsuutigaarput, taakku tamanna aallaavigalugu aalajangiijumaartut, nittartakkamut finans.dk-mut Frank Bill oqarpoq.
Suliffeqarfiit kiffartuussinissamik isumaqatigiissuteqarfigineqanngitsoortut ilagaat Greenland Contractors, taanna ukiuni kingullerni 40-ni Pituffimmi kiffartuussereerluni tassa sullissisussaajunnaarpoq.
