ASSIT Prinsesse meeqqanik Tasiilameersunik pulaartoqartoq
Meeqqat Tasiilami meeqqat atuarfianneersut pissangasut Amalienborg Slotimi Christian VIII’s palæmi prinsesse Benedikte pulaassallugu pingasunngormat tikiupput.
Prinsessip meeqqat oqalugiarfigereermagit pisarneq malillugu Tasiilarmiut meerartaat prinsessemut poortukkamik tunniussipput. Puisip amianik taskeeraliaq tunniunneqarpoq, prinsessellu tulluusimaarutigeqalugu najuuttunut takutissorpaa.
Kalaallit erinarsuutaannik erinarsortoqareermat puussiannguanik assigiinngitsunik imalinnik, ilaatigut kunngikkormiorpalaartunik imallit, meeqqanut agguaanneqarput, Chris Christophersen oqaluttuarpoq.
Meeqqat pulaarnerat akunnerup missaanik sivisussuseqartoq sakkutuut pigaartuusut nikinnerannik assiliisaqattaarnertalimmik naggaserneqarpoq.
- Ulloq pingaartoq meeqqat puigorallassanngilaat, Chris Christophersen oqarpoq.
Assit Chris Christophersenip assilisarai.
