Prins Henriup eqqumiitsuliat katersai Katuami saqqummersinneqalerput
Saqqummersitsineq Københavnimi aamma takutinneqareerpoq, allaatiginnittunillu nersualaarneqarluni. Dronningip uia Prins Henrik kalaallit eqqumiitsuliaannik soqutiginnissimavoq, katersaalu saqqummersinneqassallutik.
Prins Henrik kalaallit eqqumiitsuliaannik amerlasuunik katersisimavoq, taakkualu pingajorarterutaasa missaat Katuami saqqummersinneqassallutik.
Saqqummersitani amerlanerit kigutilissuup kigutaanik qiperugaapput, qilalukkalluunniit tuugaavinit qiperugaallutik. Eqqumiitsuliat taakku eqqumiitsuliortunit ilisimaneqartunit ilisimaneqanngitsunillu suliaapput, Kalaallit Nunaanni tamanit suliaallutik.
Kiinarpanik aamma saqqummersitsisoqassaaq, kiinarpat ilaat Tunup avannaarsuaneersuullutik. Ukkusissanit eqqumiitsuliat saqqummersitsinermi aamma takuneqarsinnaassapput.
Dronningip uiata katersaanut tapersersuiniarluni Dronning Margrethe Kunngikkormiut atisanik katersaanit atukkiisimavoq, Dronningip nammineq niviarsiaraalluni kalaallisuua inuusartalik 1952-imeersoq saqqummersinneqassalluni, soorlu aamma sapannganik nerriviup qaliliat, pooqattallu Dronning Ingridip nalaaneersut saqqummersinneqassasut.
