Politikikkut oqaaseqartartoq: Uldumip tunuarnera sanngiillissutaasinnavoq
Naalakkersuisoqatigiinni akisussaaffiit naalakkersuisup siulittaasuaniit allanngortinneqassasut taanna aamma isumaqarpoq. Aningaasaqarnermut naalakkersuisuusimasoq Anda Uldum politikkimiit tunuarnini ullumi nalunaarutigaa.
Demokraatit februarip 13-ani Nuummi immikkut ittumik ataatsimiissapput tassani siulittaasussaq nutaaq toqqagaassaaq. Partiimi siulittaasup taarserarneqarajunnera partiimut nukilaallititsisinnaasoq politikikkut oqaaseqartartoq Sten Lund isumaqarpoq.
- Marlunnik isumaqarsinnaavoq sanngiillissutaasinnaavoq imaasinnaavorluunniit nikittoqanngittoq. Kisianni taamannak formandinik tunuartoqartarnera Demokraatiniik siulliunnginnami taannartaa eqqarsarnartoqalaarpoq, Sten Lund nassuiaavoq, taassuma ilaatigut Per Berthelsen, Palle Christiansen aammalu Jens B. Frederikse siulittaasuusimasut tunuarsimasullu tikkuarpai.
Aamma atuaruk Kim Kielsen: Naalakkersuisoqatigiinnut annaasaqaataavoq
Anda Uldum 2014-mi martsimili Demokraatini siulittaasuusimavoq ukiorlu taanna qinersisoqarmat Inatsisartuni ilaasortatik marlunnik ilavaat tassa sisamanngorlutik. Qinersinerup kinngorna Anda Uldum aningaasaqarnermut naalakkersuisunngortinneqarpoq.
Tamannali taamaallaat oktoberip naanerata tungaanut sivisussuseqarpoq. Anda Uldumi stressimik eqqugaanermi kinngorna sulinngiffeqarnissamik qinnuteqarpoq, maannakkullu politikkimiik tunuarniarluni aalajangerluni.
Tamannalu annaasaqaataasoq Sten Lund isumaqarpoq, Anda Uldum ataatsimoortitsisuusoq, sullarissuusoq suliassanillu tunniussillaqqissuusoq taassuma oqaatigaa.
Aamma atuaruk Anda Uldum politikkimit tunuarpoq
Naalakkersuisut siulittaasuata Kim Kielsenip Anda Uldumip tunuarnera malitsigalugu demokraatit aningaasaqarnermut naalakkersuisoqarfik tigoqqissagaat oqaatigaa
- Aningaasaqarnermut naalakkersuisoqarfik tigummivaat Demokraatit taanna aamma naatsorsuutiginngilara allanngussasoq, Naalakkersuisut siulittaasuat Kim Kielsen taama oqarpoq.
Demokraatit siulittaasuat inissippat naalakkersuisoqatigiinni akisussaaffiit allanngortiterneqassasut politikikkut oqaaseqartartoq Sten Lund isumaqarpoq.
- Tassami taanna pinngittoorneqarsinnaajunnaarpoq Anda Uldumi naalakkersuisuniik tunuarpoq taamaalilluni taanna pinngitsoornani taarserneqassooq, Sten Lund ulluinnarni Naalakkersuisoqarfimmi sulisuusoq taama oqarpoq.
Aamma atuaruk Uldum stressernini pissutigalugu sulinngiffeqarallalersoq
Demokraatini siulittaasuugallartoq Randi Vestergaard Evaldsen aammalu Justus Hansen Demokraatini siulittaasunngorusullutik sassarniaput.
