Politikerit Tele-Post pillugu kamattut
Salloqittaanerlunneq! Akuersaarneqarsinnaanngilaq! Ingasappallaarpoq!
Oqaatsit tamakkua politiikerinit atorneqarput Tele-Postimit telekkut sullissinermik namminersortunngorsaaneq kinguartinneqarmat.
Periarfissaalertussaagaluarpormi internetimut atassusiisartuniit allaniit internetimik pisinissamik. Tele-Postili tamanna kinguartippaa siunnersortiminut aningaasartuutai ingasappallaamik amerliartorsimammata.
Tele Greenland unitsitsisussaanngilaq
Justus Hansen misigivoq Tele-Post politikkikkut tunngasut akerlianik iliortoq.
- Avaqqutiinnarsimavaatigut. Salloqittagaasutut misigivunga, naatsorsuutigisimagaluarparalu Tele Greenland akisussaasutut piffissaliussamut angummassinnaassasut. Taamaassinnaasimanngillalli. Salloqittagaasimasutut misigaanga, Justus Hansen oqarpoq.
Steen Lyngelu Atassummersoq assinganik isumaqarpoq. Taannami oqarpoq Tele Greenland unitsitsisussaanngitsoq.
- Isumaqarpunga Atassumminngaanniit taanna erseqqissartuartariaqaripput. Inatsisartuni taanna unammilleqatigiinnermik ingerlatsinissaq eqqunneqassasoq aalajangerneqarnikuuvoq, tassa takinerunngilaq. Taanna Tele Greenlandip unitsittussaanngilaa, Steen Lynge oqarpoq.
Nassuiaat naammanngittoq
Siunnersortinut aningaasartuutit amerlavallaarnerat kinguartitsinerminut pissutaasut, Tele-Postip allakkatigut nassuiaatigaa. Siunnersortillu kingorna soraarsitaasimapput.
Nassuiaalli taanna ikkappallaartoq, Inuit Ataqatigiit politikkikkut oqaaseqartartuata Naaja Nathanielsenip oqaatigaa:
- Soorlumi piffissaq kingullerpaakkut aatsaat eqqarsaatigisaq. Pikkorliornertut isigaara. Aamma sullissisuulersussanut pissusilersorneq kusananngilaq, soorlu inuiaqatigiit sinnerinut aamma taamaattoq, Naaja Nathanielsen oqarpoq.
Tele-Postimi siunnersortit sullissisut internetimut atassusiisussat Telemut qanoq akeqassanersut aalajangersortussaagaluarpaat, tamannali angumerineqanngilaq, sulialli qaqugu naammassineqarnissaa suli ilisimaneqarani.
Naalakkersuisut iliuuseqartariaqartut
Politiikerilli iliuuseqarusupput, Steen Lynge paragraf 37 naapertorlugu Naalakkersuisunut apeqquteqarpoq. Naaja Nathanielsenilu piumasaqarpoq attaveqaqatigiinnermut naalakkersuisoq Knud Kristiansen iliuuseqaqqullugu.
Justus Hansenili iluarsiissummik allamik peqarpoq.
- Tele aningaasartuutit pillugit naammangittaalliorniaruni taava sinneqartoorutit naalakkersuisut namminneq tigusinnaavaat, siunnersortitillu namminneq atorlugit suliallu sukkanerpaamik namminneq piviusunngortillugit, Justus Hansen, Demokraatineersoq, oqarpoq.
Attaveqarnermut naalakkersuisoq Knud kristiansen kiisalu Tele-Postimi pisortaanerugallartoq Steen Montgomey-Andersen suliaq pillugu aqagu aatsaat oqaaseqarsinnaapput.
