Folketingimut qinersineq 2015 Politikerit Skaalemut: Folketingi pisariaqarpoq
Folketingimut ilaasortaatitaqarneq uagutsinnut suli isumaqarpa? Savalimmiormiu folketingimut ilaasortaq nalornivoq - maanilu isummat assigiinngillat.
Nunatsinniit ilaasortaasimasup paasisinnaanerarpaa - maannakkullu ilaasortaasup isumaqatiginngilluinnarpaa.
Sooq Folketingimiissaagut inatsisillu uatsinnut attuumassuteqanngitsut akuersissutigisarlugit? Folketingimut ilaasortaq savalimmiuneersoq Sjurdur Skaale Jyllands-Postenimi taama aperivoq.
Taanna isumaqarpoq Folketingi killilimmik savalimmiormiunut naleqquttoq. Isumaqarami sulineq danskit nunap iluani inatsisaannut sammisuunerusoq. Aamma imminnut assortuuttut savalimmiormiut danskit politikkiannut akulerussinnaasut - killormuunngitsorli.
- Tunngaviatigut nunanut allanut tunngasunut- illersornissamullu politikki taamaallaat ataatsimooruppavut. Taamaattumik Folketingimi sulineq Savalimmiuneersunut Kalaallit Nunaanneersunullu killilimmik naleqquttoq. Taamaattuminguna taaseqataavallaartanngitsugut, Sjurdur Skaale oqarpoq.
Aamma atuaruk Folketingimut qinersineq 2015 Savalimmiormiu: Atlantikup avannaamiut Folketingimi issiatitaqarunnaassappat?
Folketingimi ilaasortaasimasup Lars-Emil Johansenip taanna tunngaviatigut isumaqatigaa. Isumaqarami naleqqutinngitsoq Savalimmiormiut Nunatsinneersullu nunap allat inatsisartuiniinnissaat naleqqutinngitsoq.
Naak Namminersulersimagaluarluta silatusaarnerulaarpoq Folketingimi ilaasortaatitaqarneq, Lars-Emil Johansen nassuerpoq.
Maannakkut Folketingimut ilaasortaasup Johan Lund Olsenip Skaale isumaqatiginngilluinnarpaa. Folketingimi suliassarpassuaqartoq, taanna oqarpoq.
Aamma atuaruk Aviisi: Atlantikup avannaamiut ilaasortaatitaasa oqallisaanerat Tuluit Nunaanni oqallinnermut assinguvoq
Johan Lund Olsenip erseqqissarpaa Nunatsinnut annertuumik pingaaruteqartut suliassaqarfiit 32-it suli danskit aalajangiiffissarigaat. Soorlu nunanut allanut- sillimaniarnermullu tunngasut, aammali politeqarneq, inuussutissat isumannaatsuunissaat, ilaqutariinnut eqqartuussiveqarneq sulinermilu isumannaallisaaneq.
Ilaasortaatitaqarnissarput pingaaruteqarpoq, Johan Lund Olsen oqarpoq.
- Tassami naatsorsuutigisinnaanngilarput, danskit politikeriisa folketingimi inatsisiliornermi aammalu oqallinerni uagut soqutigisagut tamakkiisumik illersussagaat aammalu saqqummiussortassagaat. Tamanna arlaleriarluta takusareerparput, assersuutigiinnarlugu Pituffimmi kiffartuussinisamut isumaqatigiissutip saqitsaassutaanerani takuarput danskit naalakkersuisuisa nunatsinni soqutigisagut tamakkiisumik illersorniarsimanngikkaat, Johan Lund Olsen oqarpoq.
Aamma Doris Jakosen pissarsiariniarsimagaluarparput saaffiginnissuterpulli qisuariarfigisimanngilaa.
Aamma atuaruk Qinersinermi danskit naligiinnerujussuisa sunniuteqarterujussuassavaatigut
