Politikerit: Qaqortumi mittarfik ineriartortitsissaaq
Qaqortumi mittarfiliortoqarnissaa ukiorpassuarni oqallisaareersoq maanna aningaasanut inatsisissatut siunnersuummi mittarfiliortoqarnissaanut aningaasanik immikkoortitsisoqarpoq.
Allattoq Mads Pedersen
aggustip 23-at 2014 08:00
Tamanna attaveqarnermut naalakkersuisup Steen Lyngep aningaasartuutinik sipaarfiusinnaasoq oqaatigaa.
- Inuit kujataanut angalasartut 40 procentii Qaqortumukartarput. Mittarfiliornerup kingunerissavaa kiffartuussilluni angallassinermut aningaasartuutigisartakkat annikillineri. Taamaasilluta namminersorlutik oqartussani sipaaruteqassuugut. Aappaattullu atorfillik angalasarnerini aningaasartuutit sipaaffigineqarsinnaapput, Steen Lynge oqarpoq.
Ilanngullugu oqaatigaa Narsarsuup timmisartoqarfia matuneqarnavianngitsoq timmisartorfigineqartarnerili annikillisinneqaannassasut aamma pisariaqalerfiatigut miffigineqarsinnaanissaa takorloorneqartoq oqaatigalugu.
Kommune Kujalleq ukiuni arlalinni ineriartornikkut unittooqqasimasoq aamma neriulluarpoq. Qaqortumi mittarfiliortoqassappat tamanna kommunimut pitsaasumik sunniuteqartussaassasoq, Kommune Kujallermi borgmesteri Jørgen Wæver Johansenip nalilerpaa.
Aamma atuaruk Qaqortup mittarfittaarnissaa qanilleqqippoq
- Timmisartoqarfissap sanaartorneqarnissaa aallartippat, tamanna ukiuni arlalinni suliffissaqartitsisussaavoq aammalu akileeraarutitigut isertitaqarnerunermik kinguneqartussaalluni. Aappaattullu maani tunisassiarineqartut avammut niuerutigineqarnisai periarfissaalissooq.
Jørgen Wæver Johansenip aamma oqaatigaa, mittarfiliornerup pilersissagaa, kommunip siuariartornissaa.
- Takornariaqarnikkut annertuumik periarfissaqalissuugut. Aaamma Nunatta sinneranut angallannissamut periarfissaginnerulertussaavugut. Qularnanngitsumik Nunatta sinneranut suleqatiginninnissamut periarfissaginnerulissaagut. Taakkulu tamarmik sipaaruteqarnermik kinguneqarumaarput, inuussutissarsiornermillu inerisaanerunermik kinguneqarumaarlutik, Kommune Kujallermi borgmesteri taama oqarpoq.
