Politikerit misissuineq nangikkumagaat

Aleqa Hammond aamma Kuupik Kleist pisortat aningaasaataannik atornerluisimasut Kukkunersiuinermut Ataatsimiitsitaliamit sapaatip akunnerata siuliani saqqummiunneqarpoq. Tamannalu aalassatsitseqaaq, Naalakkersuisullu uppisitaaneranik qinersinissamillu suaaruteqartoqartariaqarnermik kinguneqarluni.

Aleqa Hammondip Kukkunersiuinermik Ataatsimiitsitaliap unikkallarnera sakkortuumik isornartorsiorpaa, naalakkersuisuusimasullu akisussaaffimmik qimarratiginninnerarlugit.

- Misissuiffigineqartut qimarrammata. Pisuutitsiniartut amerlammata. Suliap inernissaanut utaqqisinnaanngimmata. Akisussaaffik qimarratiginngisaannarpara, Aleqa Hammond Facebookimini allappoq.

Partii Naleraq: Ernumanartoqanngilaq

Partiit tamarmik Kukkunersiuinermut Ataatsimiitsitaliap suliani nangissagai oqariartuutigaat.   

- Inatsisinik unioqqutitsisoqarsimanersoq qulaajarnissaa pingaaruteqarpoq, inunnut ataasiakkaanut tutsinneqaannarani, Nikku Olsen, Partii Inuit, KNRimut oqarpoq, misissuinerlu nangeqqinneqarnissaanik kissaateqarneq oqaatigalugu.

Siumup suliaq nanginneqarnissaa aamma pingaartippaa.  

- Suliaq nangeqqinneqarnissaa pingaartipparput. Kukkussut uteqqinneqassanngippat paasiariaqarparput qanoq pisoqartarsimanersoq innuttaasunit paasineqarnissaa aamma pingaaruteqarpoq, Karl Kristian Kruse, Siumut, oqarpoq.  

- Inuit Ataqatigiinnit misissuinissaq tikilluaqqungaarparput, kissaatigaarpullu suut tamarmik saqqummiunneqassasut, Julianne Henningsen tusagassiutinut allappoq.

- Ataatsimiitsitaliap suliaq nangeqqissavaa, taamanna ernumamartortaqanngilaq. Qulaajagassat qulaajarneqassaqqaarput, Hans Enoksen nassuiaavoq.

- Kukkunersiuineq nanginneqarnissaa kissaatigaarput, innuttaasut toqqissiniassammata, minnerunngitsumillu pisup assinganik pisoqaqqinnginnissaa qulakkeerusukkatsigu, Knud Kristiansen, Atassut oqarpoq.

Demokraatittaaq Kukkunersiuinermut Ataatsimiitsitaliap suliaa nanginneqassasoq qularinngilaat.

- Soorunami Kukkunersiuinermut Ataatsimiitsitaliap qulaajagassat qulaajassavai. Tamanna avaqqunneqarsinnaanngilaq, Andreas Uldum, Demokraatit, nassuiaavoq.

Taamaasilluni erserpoq partiit tamarmik naalakkersuisoqarfinni atornerluisoqarsimanersoq misissorneqarnissaa kissaatigigaat.

Inatsisartut Siulittaasuata ualilluinnartoq nalunaarutigaa Kukkunersuinermut Ataatsimiititaliap misissuititsinera aallartereersoq ingerlaannassasoq.

- Nunatta Karsiata naatsorsuutaasa kukkunersiorneqartarnerannut Inatsisartut ataatsimiititaliaata
misissuisitsinera aallartereersoq ingerlaannassaaq. Misissuinermi paasisat qinersinerup
kingorna Kukkunersiuinermut Ataatsimiititaliamut nutaamut saqqummiunneqarumaarput
2013-imut Nunatta Karsiata Naatsorsuutai pillugit isumaliutissiissuteqarnissaq eqqarsaatigalugu.