Politiitut ilinniartitaaneq nutaaq piareersarneqaleruttortoq

Politiitut ilinniartitaaneq nutaaq piareersarneqaleruttortoq, aviisimi oqaluttuarineqarpoq. Tamatumunnga atatillugu siunissami politiinngortartussat atuagarsornermik ilinniarsimanerunissaat politiit qullersaasa isumaliutigaat.

Inuiaqatigiinni suliassat naammassiuminaannerulersut, politimesterip Bjørn Tegner Bayip oqaatigaa. Tamannalu politiinut annerusumik piumasaqaateqarfiuvoq.

Taamaattumik politiinngorniassagaanni ilinniarnertuunngorsimanissap piumasaqaataalernissaa mattukkusunngilaa.

Ilinniagaqalerniarlutik qinnuteqartussanut piumasaqaateqarnerulernerup kinguneranik qinnuteqartartut ikileriaateqarsinnaanerat, politimesterip nassuerutigaa.

- Kalaallit Nunaanni assersuutigalugu Danmarkimisulli inuusuttut amerlasuut inuusuttunut ilinniartitaanernik aallartitsisannginnerannik unammilligassaqarnerput isiginngitsuusaarsinnaanngilarput, Bjørn Tegner Bay Atuagagdliutinut oqarpoq.

Tamatumunnga atatillugu aamma tikkuarpaa tamanna killormut aamma sunniuteqarsinnaammat. Tassami ilinniarnertuunngoqqaarsimanissamik piumasaqaateqarpat, taamalu ilinniarneq bachelorinngorniarfiulerpat ilinniagaq pilerigineqarnerulersinnaammat.

Apeqqut alla tassaavoq, politiinngorniarfik Nuummi inissisimaannassanersoq imaluunniit Nunatta avataanut nuunneqassanersoq. Tamanna politiit qullersaasa Danmarkimi politiit qullersaqarfiat Danmarkimilu politiinngorniarfik peqatigalugit maanna isumaliutigaat.

Politimester Bjørn Tegner Bayilli Atuagagdliutinut erseqqissarpaa, isumaliutit tamakku qanoq inerneqarsinnaanerat oqaatigissallugu maanna suli siusippallaartoq.