Politiit ukiumoortumik kisitsisitigut paasissutissaataat nikalluallannartut
Nalunaarutiginninnerit katillugit 4338-t politiinit nalunaarsorneqarsimapput, 2013-imut naleqqiullugit 375-inik ikinnerullutik. Taakkunanngali 24 procentit tassaapput "inunnut ulorianaatilimmik pinerluutit" - tamatumani ilaatigut pineqarlutik nakuuserneq, pinngitsaaliilluni atoqateqarneq aammalu meeqqanik kinguaassiutitigut atoqateqarneq. Taakkulu amerlassusaat nunanut allanut naleqqiullugit amerlanerujussuupput.
Danmarkimut sanilliutissagaanni, Kalaallit Nunaanni 2014-imi nakuusernerit innuttaqassutsimut naleqqiullugit Danmarkimit sisamariaammik amerlanerupput kinguaassiuutitigullu pinerlunnerit 13-eriaammik amerlanerullutik.
- Taamaammat tamatumunnga tunngatillugu pitsaaliuinermik suliaqarnerup annertuumik ingerlanneqarnissaa suli pisariaqarpoq. Suliamut attuumassuteqartut - isumaginninnermi oqartussat, atuarfiit, Peqqinnissaqarfik, namminneq kajumissutsiminnik suliniaqatigiiffiit, Pitsaaliuinermik Siunnersuisoqatigiit (PiSiu) aamma Kalaallit Nunaanni Politiit suliassaq ataatsimoorlutik kivittariaqarpaat, politimesteri Bjørn Tegner Bay nalunaarusiap aallaqqaasiutaani taama allappoq.
Pinngitsaaliilluni atoqateqarnerit 132-t nalunaarsorneqarsimapput - 2013-imut naleqqiullugit 20-nik amerlanerullutik. Taakkunannga 24-t Tasiilami Illoqqortoormiunilu pisimapput, 19-it Qaqortumi 17-illu Nuummi pisimallutik.
Sulianit takkunannga 52-it meeqqanik 15-it inorlugit ukiulinnik kinguaassiutitigut atoqateqartarnerit pineqarput, ukiup siulianut naleqqiullugit 18-inik ikinnerullutik. Taakkulu amerlanersaat Qaqortumi pisimapput, 14-it nalunaarutigineqarsimallutik.
Kisitsisitigut paasissutissat aamma takutippaat, inuit sisamat 2014-imi toqutaasimasut, toqutseriarnerit 16-iullutik mianersuaalliorlunilu toqutsinerit pingasuusimallutik. Illunut tillinniarnerit niuertarfinnilu tillinniarnerit 2013-imut naleqqiullugit allannguuteqarpallaanngillat. Ikiaroornartut pillugit suliat aamma amerleriaateqarput - suliat 629-iupput ukiup siulianut naleqqiullugit 44-nik amerlanerullutik, 2012-imullu naleqqiullugit 55-inik amerlanerullutik.
Politiit nalunaarusiaat tamakkerlugu ataani atuarneqarsinnaavoq.
