Narsaq Politiit takunnissimasinnaasunit ikioqqupput
Narsami Politiit pinngitsaaliilluni arnerisoqarsimaneranik nalunaarut ippassaq sapaammi ullaassakkut nalunaaqutaq 05:13 kalerrinneqarput, Blok A-p saavani pinnguartarfimmi akunneq ataaseq sioqqullugu pinngitsaaliisoqarsimanera politiinut kalerriutigineqarpoq. Kalaallit Nunaanni politimestereqarfik taama nalunaaruteqarpoq.
Arnaq pinngitsaalineqartoq nalunaaqutaq sisamat missaanni angerlariartorsimavoq. A34-p eqqaani imerniartarfik Inugssuk saneqqullugu Louiseq Aqqutaatigut napparsimmaviup tungaanut ingerlasimavoq.
Inuit pingasut allat siulerisimavai, taakku napparsimmavimmit talerpimmut Avannarlikkoorlutik ingerlaqqipput. Arnaq pineqartoq napparsimmavik saneqqullugu Aaninngivit tungaannut ingerlasimavoq. Blok D-p nalaani pisuinnaat aqqutaatigoorsimavoq Blok A-p tungaanut pinnguartarfik aqqutigalugu. Inuk alla pisuinnaat aqqutaatigoorpoq, takusinnaasimanngilaali inuk taanna sumut sangusimanersoq.
Arnaq Blok A-mut suli anngunnani angummit ataatsimit saassunneqarpoq. Saassunneqartoq nillialerpoq, saassussisorlu Josefip Aqqutaatigut qimaasimavoq, saassunneqartullu saassussisumut ilisarnaatinik tunniussisinnaasimanngilaq.
Inuillu Blok A-p eqqaani pinnguartarfimmi saassussinermik takunnissimasinnaasut tusaasaqarsinnaasulluunniit Narsami politiinut saaffiginneqquneqarput, inuillu pingasut siulerisimasai Narsami politiinut taamaammat saaffiginneqquneqarput.
Saaffiginninnerit suulluunniit soqutiginaateqarput, Narsami politiit taama oqarput, Narsamilu politiit oqarasuaataasa normoraat 70 11 24.