Politiit qumiguullip nakkarnera pillugu: Ajornartoornermi mittariaqarneq motoorip qaminneranik pissuteqarpoq

Qulimiguulik Narsarsuarmiit Qaqortumukartilluni pingasunngornermi ualikkut ajornartoornermi mittariaqarsimavoq.

Qulimiguulimmik ingerlatsisoq kisimiilluni issimasuuvoq, taanna qulimiguulimmit annaassiniartartunit nassaarineqarpoq imaaniillu qaqinneqarluni.

Kalaallit Nunaanni Politiit pisoqarnerata aqaguani misissueqqissaaleruttorput, taakkulu qulimiguulimmi aquttoq siulliullugu oqaloqatigaat.

Kalaallit Nunaanni Politiini politikommissæri, Karl Sværd KNR-imut ima oqarpoq.

- Pilotia annanniummi pullattakkamiittoq. Taava Qaqortumut nakorsiunneqarpoq masallunilu nillertuinnaasimagami, Karl Sværd oqarpoq.

Poltiiillu qulimiguulimmik ingerlatsisoq aamma killisiorpaat, taassumalu ingerlaarnermini ajutoornermik nalunaaruteqarfigineqarsimalluni nassuiaatigaa.

- Kisiat siulliit paasiniakkagut malillugit pilotip apersorneqarnera malillugu motoria qamissimavoq, taava mittariaqalerluni immamut, Karl Sværd oqarpoq.

Napparsimmavimmi passunneqartoq

Kalaallit Nunaanni Politiit Narsamit kujammut kangimut 13 kilometeritut ungasitsigisumit ajutoortoqarsimaneranik kalerrisaarummik pingasunngornermi ualikkut marluk qaangerlugit tanneq marluk missaanni tigusaqarsimapput.

Issittumi Sakkutooqarfik suleqatigalugu annaassiniarneq aallartinneqarpoq, qulimiguulimmillu annaassiniartartumik ajutoorfiup nalaanukartitsisoqarluni, tassanilu qulimiguullip aquttua imaani nassaarineqarpoq.

- Iluatsitsinerusimavoq, ilaasoqartussaasimagaluarluni taamaatiinnarsimagami, politikommissæri Karl Sværd KNR-imut oqarpoq.

Angut danskiusoq, 40-nik ukiulik timmisartumi ingerlatsisuusoq imaanit qaqinneqarpoq Qaqortumilu napparsimmavimmukaanneqarluni passunneqarpoq.

Imaani ajutoortoqarsimatillugu misissuisartut misissueqqissaarnermi ikiuukkiartorlutik Narsamukarput. Qulimiguulik aamma nunamukaanneqareerpoq.