Nakkutilliisoqatigiit: Politiinik suleqateqarnermut erseqqissunik malittarisassaqanngilaq
Tamanna Namminersorlutik Oqartussat nakkutilliisoqatigiivisa Qeqqata Qaasuitsullu kommuniini nakkutilliinerminnut atatillugu politiinik suleqateqarnermik misissuisimasut uparuarpaat.
Nakkutilliisoqatigiit naapertorlugit, suliassaqarfiit pingasut pingaarnertut suleqatigiissutigineqartarput. Siullertut, inunnik isumaginnittoqarfiup pigaartuata ornigunnerani politiit ikiuussinnaasariaqarput.
Aappaattut, meeqqat inuusuttullu pillugit suliat pinerluttuliornermik imaqartut paasiniaaffigineqarnissaat politiit suliassaraat.
Pingajuattut, inunnik isumaginnittoqarfimmi sulisut sioorasaarneqarnerini politiit sapinngisamik ikiuisassapput.
Politiit nalilertassavaat
Politimesterip Bjørn Bayip, taamatut isornartorsiuisoqarnera akissuteqarfigalugu KNR-imut oqaatigaa, suliassaqarfinnut tunngatillugu malittarisassat nalinginnaasumik allassimasuutigineqanngitsut, susassaqarfiit pillugit inatsisiliornermi malittarisassat eqqaassanngikkaanni. Isumaqartoqarpat isumaginnittoqarfiup pigaartuata aggersarneqarnerani politiit tamatigut peqataasassasut tamanna kukkunerussaaq.
- Inunnik isumaginnittoqarfiup pigaartuata ajornartorsiulersinnaaneranut takussutissaqartariaqarpoq. Tamannalu politiit pisumit pisumut naliliiffigisassavaat, Bjørn T. Bay oqarpoq.
Pisuni isumaginnittoqarfiup pigaartuata politiinit ikiorneqartariaqarluni naliliiffigisaani ikiorneqarnissaminik pisussaaffeqarnera nalunaarusiami oqaatigineqartoq isumaqataaffiginngilaa.
Paasiniaaneq
Pinerluttuliortoqarsimaneranik pissutsit pillugit suliat paasiniaaffigineqarnissaannut tunngatillugu, Namminersorlutik Oqartussat nakkutilliisoqatigiivi isumaqarput politiit pinerluttuliornermik iliuuserineqartut tamatigut paasiniaaffiginissaat pisussaaffigigaat. Aamma pinerlussimasorineqartoq 15-it inorlugit ukioqaraluarpalluunniit.
Politimesterili Bjørn Bay naapertorlugu, pinerluttuliortoq 15-it inorlugit ukioqarpat, tassalu pillaatissinneqarsinnaanermut ukiut ammut killingitat inorlugit ukioqarpat, suliat politiit tunngaviatigut paasiniaaffigisussaanngilaat. Suliat taama ittut inunnik isumaginninnermi oqartussanut ingerlateqqinneqartarput, aamma pinerluttuliorsimasoqartillugu, soorlu assersuutigalugu pinngitsaaliisoqarsimatillugu.
Nakkutilliisoqatigiit Qaasuitsup Kommunia pillugu nalunaarusiaminni suliaq aalajangersimasoq assersuutitut taavaat. Suliami pineqartumi pinerluttuliortoq 15-it inorlugit ukioqarpoq, politiilli suliap paasiniaaffiginissaa itigartitsissutigaat. Meeqqanik kinguaassiuutitigut atornerluinerit arlallit suliami pineqarput. Politiillu itigartitsinerisa kingorna inunnik isumaginnittoqarfiup pinerluttoqarneranik paasiniaaneq nammineerluni aallartittariaqarsimavaa, tamannalu suliap suliareqqinneqarneranut kingunerlutsitsisimalluni, nakkutilliisoqatigiit taama allapput.
Bjørn Bayip tamatumunnga tunngatillugu oqaatigaa pinerluttoqarneranik paasiniaaneq inunnik isumaginnittoqarfiup ingerlassinnaanngikkaa, politiit kisimik taamaaliorsinnaatitaammata. Inunnilli isumaginnittoqarfiup, suliaq taama ittoq ingerlatsineq pillugu inatsisit naapertorlugit misissuiffigisariaqarpaa, soorlu suliat allat isumaginnittoqarfimmit taamatut aamma misissuiffigineqartartut
