Politeeqarnermut isumaqatigiinniarsimaneq Inuit Ataqatigiit ajuusaarnartoqartippaa

Danskit politeeqarneq pillugu isumaqatigiissutaanni Kalaallit Nunaanni politeeqarnerup immikkut sammineqannginnera IA-p folketingimut ilaasortaatitaata, Aaja Chemnitz Larsenip, ajuusaarutigaa.
novembarip 17-at 2015 12:01

Isumaqatigiissummi danskit naalakkersuisuinit Dansk Folkepartiimit, Liberal Alliancemit, Konservativinit Socialdemokratiniillu ullumi isumaqatigiissutigisaanni, savalimmiormiut kalaallillu folketingimut ilaasortaatitai isumaqatigiinniarnernut peqataatinnagit ingerlanneqarsimavoq.

- Ajuusaarnartorujussuusoq isumaqarpunga, tassami Kalaallit Nunaanni politiit, danskit politiivinit allaanernik atugassaqartinneqarlutik sulisut, immikkut sammineqartariaqaraluarput, Aaja Chemnitz Larsen KNR-imut oqarpoq.

Aamma atuaruk Danskit politeeqarneq pillugu isumaqatigiissutaanni Nunarput peqataatinneqanngitsoq

Nunap immikkoortortai assigiinngissitaarnagit

Venstre Socialdemokratillu inatsiseqarnermut tunngasunik oqaaseqartartui naapertorlugit isumaqatiginninniarnerni Kalaallit Nunaanni Savalimmiunilu pissutsit eqqartorneqarsimanngillat. Isumaqatigiissullu nunap immikoortortaanik assigiinngissitaarinngilaq, politiilli aappaagumiit 2019-ip tungaanut aningaasaqarnerannik pingaartitsinerulluni ingerlasimasoq.

- Naalagaaffiup politiivisa aalajangissavaa sumi pinerlunneq akiorneqassanersoq, Socialdemokratit inatsiseqarnermut tunngasunut oqaaseqartartua, Trine Brahmsen KNR-imut oqarpoq.

Naalagaaffiulli politiivisa pingaartitassaaannik timitalikkanik imaqarpoq, soorlu peqqarniisaarniarnermut akiuiniarluni suliaqarneq, najugaqarfinni inuuniarnikkut ajornartorsiorfiusuni immikkut iliuuseqarneq politiillu Danmarkimi ilinniartitaanerannik allannguineq.

Aamma atuaruk Inatsiseqarnermut tunngasut Aleqap immikkut samminiarai

Toqqaannanngikkaluamik Kalaallit Nunaannut sunniuteqassaaq

Politiit ilinniartitaannerannulli tunngasut peqqarniisaarnianillu akiuineq toqqaannanngikkaluamik Kalaallit Nunaannut sunniuteqassasoq, Chemnitz Larsen isumaqarpoq. Nunatsinni politiinngorniarfimmi Danmarkimi politiinngorniarfimmi sammisat assigalugit ilinnartoqartarpoq.

Aningaasallu danskit politiivinit atorneqartussat Kalaallit Nunaanni suliassanut atorneqartussaagaluit atorneqarsinnaapput, Aaja Chemnitz Larsenip taamaattoqarnissaa isumaalugaa.

- Paasinarluinnarpoq peqqarniisaarniarnerup akiorneqarnissaa danskit politiivinit sammineqarmat. Kalaallilli politiivinut arlaatigut eqquinissaa qununalaarsinnaavoq, imaassinnaavormi Kalaallit Nunaanni politiit suliaasa ineriartortinneqarnerat kingulliullugu peqqarniisaarniarneq akiorniarlugu iliuutsit salliutinneqarnerusut, aamma aningaasaqarnerup tungaatigut, Chemnitz Larsen oqarpoq.

Aaja Chemnitz Larsen (IA) Aleqa Hammnodilu (S) arlaleriarlutik isumaqatigiinniarnernut peqataatinneqarusullutik oqaatigisareerpaat, ilaatigut politeeqarneq pillugu isumaqatigiinniarnerni. Isumaqatigiinniarnernut peqataatinnagit inatsisinik atuutsitsinermut ministerip decembarip qulingani ataatsimiigiaqqusimavai.