Inuussutissarsiutit

Polenimi umiarsualiorfik: RAL oqaloqatigaarput

Polenimi umiarsualiorfiup Remontowa Shipbuildingip Royal Arctic Linemut sisamanik umiarsualiortup Maritime Danmarkimut uppernarsarpaa kalaallit umiarsuaatileqatigiiffiannut umiarsuarnik sisamanik tunniussinissaq pillugu umiarsualiorfik maanna oqaloqatiginnittoq.

Allattoq Simon Uldum -

juunip 30-at 2016 07:42

- Suliniutip isumaqatigiissutitsinni killiliussat iluanni pitsaasumik inerneqarnissaa qulakkeerniarlugu iliuusissat pillugit Royal Arctic Line oqaloqatigaarput, umiarsualiorfiup attaveqaqatigiinnermut pisortaa ,Maria Bninska, Maritime Danmarkimut mailikkut taama allappoq.

Attaveqaqatigiinnermut pisortap mailimi erseqqissaatigaa isumaqatigiissutaasoq allanngortinneqarsimanngitsoq illuatungeriinnullu suli pituttuisuusoq.

Umiarsualiorfik naapertorlugu umiarsuit sisamaasut naammassineqangajalerput, sapaatit-akunnerinilu tulliuttuni tunniunneqarnissaat piareerneqassasoq. Umiarsuit ilaat ataaseq 108 TEU-nik usisinnaassuseqartoq misilittarneqareerpoq piffissamili qanittumi umiarsuaatileqatigiiffimmut tunniunneqassalluni.

Aamma atuaruk Tusagassiuut: RAL-ip umiarsuarsiassani marluk pisiariniarunnaaginnarai

- Royal Arctic Linemeersut umiarsuit misilerarneqarnerinut peqataapput umiarsuarlu iluarisimaarnerarlugu, attaveqaqatigiinnermut pisortaq mailimi taama allappoq. Taamaammat aamma Royal Arctic Linep umiarsuarnik marlunnik pisiniarunnaarnera pillugu Maritime Danmarkip allaaserisaa umiarsualiorfiup tupaallaatigilluinnarsimavaa.

Royal Arctic Linep - Maritime Danmarkip paasissutissat pissarsiarisimasai naapertorlugit - umiarsuarnit Gdanskimi umiarsualiorfimmi sanaartortitaminit sisamaasunit marlunnik pisiniarunnaarneranik Maritime Danmarkip marlunngormat allaaserisaqarnerata kingorna Remontowa Shipbuilding taama qisuariaateqarpoq.