Polar Seafoodimi sulisoq ajunaartoq
Alianaqisumik paasitinneqarpugut Aasianni fabrikkimi sulisutta ilaat inuusuttoq, immami ipilluni ajunaarsimavoq. Polar Seafood tusagassiuutinut taama allappoq.
Qanorpiarli pisoqarsimanera suli ilisimaneqanngitsoq, suliffeqarsiup siulittaasuata, Henrik Lethip, oqaatigaa.
- Qanorpiaq pisoqarsimanera suli ilisimanngikkaluarparput, politiilli Sullivinnullu Nakkutilliisoqarfik sapinngisarput tamaat atorlugu paasissutissanik tuniorarpagut, ajutoorneq qanoq pisimanersoq paasineqarniassammat, Henrik Leth oqarpoq, nangillunilu;
- Suliffeqarfitsinni tamani sillimaniarneq pingaartinneqarluinnarpoq, taamaammallu tamatta - Aasianni fabrikkimi, Polar Seafoodimilu sulisuusugut tamatta tupaqqaqaagut - suleqaterput pikkorissoq taama alianartigisumik annaagatsigu.
Angut inuusuttoq ullaaq sisamanngornermi Aasianni Polar Seafoodip suliffeqarfiata eqqaani immami nalunaaqutaq 04.45 nassaarineqarsimavoq. Angut inuusuttoq sulitilluni ajunaarsimasoq Henrik Leth KNR-imut ilisimatitsivoq.
