PK: Naalakkersuisut anguniagaat piukkoorpallaarput
Inuuti Fleischer Naalakkersuisunngortussat isumaqatigiissutaat atuaqqaaramiuk isumalluarpallaanngikkaluarluni qanoq pisoqarnissaa piffissap takutikkumaaraa isumaqarpoq:
- Massakkut ukua takuinnarlugit ilaatigut ilai piviusorsiorpalaartutut nalilinnginnatsigit, kisianni atagu taakkua periarfissilaartigit Naalakkersuisut nutaat, inissippata taava oqaloqatigiinnerput aallartissinnaavoq, Peqqissaasut Kattuffianni siulittaasoq Inuuti Fleischer KNR-mut taama oqarpoq, taassumalu oqaatigaa suleqatigiinnissaq ikioqatigiinnissarlu peqqinnissamut naalakkersuisuusimasup naammassilluagaa aamma naalakkersuisunngortup maanna naammassilluassagaa.
Tassani piviusorsiunngitsutut isigisaa tassaavoq Naalakkersuisut isumaqatigiissutaanni qupperneq 16-mi allermi allanneqarsimasumi ilaasoq ima allassimasoq "Nuummi immikkut nuummiunut napparsimaveqalernissa nakorsiartarfiulluunniit aapperneqarsinnaanera Naalakkersuisooqatigiit sulissutiginiarpaat".
Tamassumap piviusunngortinnissaa Peqqissaasut Kattuffiani Siulittaasup ajornassangatippaa:
- Tassa apeqquterujussuuvoq, naluneqanngilaq sulisussarsiortuartoq peqqinnissaqarfik aammalu ilaatigut suliffiit inuttaqanngittut inuttaleruminaattuusut, taamaattumik unamminartorujussuusussaassoq nuummi napparsimaviliorniarunik, atorfiit maanna pioreersut tamakkiisumik inuttalerneqarsinnaannginnerat eqqarsaatigalugu, Peqqissaasut Kattuffianni Siulittaasoq Inuuti Fleischer KNR-mut taama oqarpoq.