Pituttorsimanngitsut KNR misissuiffigissavaat
KNR isiginnaartartunut naalaartartunullu naammaginartumik sullissinersoq arlaannaannulluunnit attuumassuteqanngitsunit misissorneqartussanngorpoq. Suliaq kultureqarnermut Naalakkersuisumit Mimi Karlsenimit aallartinneqartoq inatsisartuni ilalerluarneqarpoq.
KNRip aningaasaqarniarnera sivitsortumik qassiiliutaavoq.
- Suliaq sivisuumik suliaqarput. Kisianni ingerlariaqqissagutta paasissutissat suli amerlanerusut pisariaqartippavut, Mimi Karlsen KNR-mut oqarpoq.
KNR-mit arlaleriarluni oqaatigineqartareerpoq aningaasassaaleqineq atortullu nungullarsimasut.
- Atortut nungullartut arlaleriarluta tusartarparput. Taamaammat iluarisimaarnarpoq misissuisoqartussanngornera, Andreas Uldum Demokratiniik oqarpoq.
Misissuinissaq illuatungiliuttunit aamma iluarisimaarneqarpoq.
- Tunngavissarissaarnissarput pisariaqarpoq inuiaqatigiit tusagassiutitigut sullinneqarnerisa qulakkeerneqarnissaa anguniarlugu, Siumup siulittaasua Aleqa Hammond oqarpoq.
Mimi Karlsenip erseqqissarpaa paasissutissat KNRmit tunniunneqareersut apeqquserneqanngitsut. Misissuinermili anguniarneqartut ilagaat aningaasaliissutareersut iluani allatigut iliornikkut pitsaanerusumik angusaqartoqarsinnaanersoq.