Pituffiup isumasioqatigiissutiginissaa matoqqasumik ingerlanneqassaaq

Folketingip Kalaallit Nunaannut tunngasunut ataatsimiititaliaata tamanna nalunaarutigaa.

AAMMA ATUARUK Per Aarsleff A/S-ip Pituffiup aalajangiiffigineqarnera suliassanngorteqqikkaa

Partii Venstre, Inuit Ataqatigiit, Siumut, Konservativiit, Dansk Folkeparti, Enhedslisten Liberal Alliancelu peqatigalugit statsministerimik Helle Thorning-Schmidtimik nunanullu allanut tunngasunut ministerimik Martin Lidegaardimik nutaamik isumasioqatigiittoqarnissaanik kissaateqartuuvoq, Pituffimmi kiffartuussinissamik isumaqatigiissummut atatillugu suliariumannittussarsiuussinermut atatillugu suliaq eqqartorneqassalluni.

Suliffeqarfiit kiffartuussinissamik suliariumannittussarsiuussinermut atatillugu neqerooruteqarsimasut pillugu Danmarkip nunanut allanut tunngasunut ministereqarfiata USA-p illersornissaqarfianik ikiuerusussimanngitsoq qanittukkut paasinarsivoq.

Suliariumannittussarsiuussinermut atatillugu piumasaqaatit Namminersorlutik Oqartussat namminneq aamma akuerisimagaat erserpoq.

Soorlu ilisimaneqalereersoq amerikamiut suliffeqarfiiutaat Exelis Services A/S, illersornissaq pillugu Danmarkip USA-llu akornanni isumaqatigiissut unioqqutillugu Pituffimmik kiffartuussinissamik isumaqatigiissusiorfigineqarpoq, tamannalu assigiinngitsunit isornartorsiorneqarpoq.

AAMMA ATUARUK GC: Pituffik pillugu suliamut mianersoqquneqarsimanngilagut

Kiffartuussinissamik isumaqatigiissut pillugu Folketingimi siusinnerusukkut isumasioqatigiittoqarmat tamanat ammasumik isumasioqatigiittoqarpoq, maannalu isumasioqatigiinnissaq matoqqasuussalluni.

Siunnersuutit isumasioqatigiinnermi eqqartorneqartussatut siunnersuutigineqartut arlallit tunuartinneqarnikuupput, tamananalu pissutaalluni isumasioqatigiinnerup matoqqasuunissaa aalajangerneqarluni. Folketingip Kalaallit Nunaannut tunngasunut ataatsimiititaliaata allattoqarfia taama nalunaaruteqarpoq.

AAMMA ATUARUK Namminersorlutik Oqartussat Pituffik pillugu suliamut mianersoqquneqarsimapput