Pituffiup eqqaani aatsitassarsiornissaq 100-nik sulifissaqartitsisinnaavoq
Pituffiup eqqaani aaatsitassarsiornissaq Namminersorlutik Oqartussani tusarniaassutigineqaleruttorpoq. Suliffeqarfik Qaanaap kujataani Moriusap kangiani sissami saviminissanik titaniummilinnik piaaniarpoq.
Tusarniaassutigineqartoq naapertorlugu aatsitassarsiorfik 100-nik sulisoqassaaq ukiunilu 30-ni atassalluni. Piiaaffissalli eqqaani uumasut akornusersorneqarsinnaapput.
Aatsitassarsiortitseqatigiiffiup BlueJay Miningip Moriusap eqqaani ima misissueqqissaartigaaq, allaat pilersaarusiaat maanna tusarniaassutigineqarluni.
Sioqqat qernertut qallorneqassapput
Piiaaffissaq Qaanaamiit kilometerinik 80-inik kujasitsigisumiippoq, Moriusap kangia tungaaniilluni.
Sioqqat qernertuusut sissami sissallu avatinnguani assanneqassapput.
Sissaq tamanna sukuluinnerpaat ilaannik titaniumitalimmik saviminissaqarpoq.
Aatsitassarsiortut titaniummitalimmik saviminissamik 400.000 tonsimik ukiut tamaasa pissarsinissani naatsorsuutigaa.
Aatsitassarsiorfiup sanaartornerani 100-nik sulisoqassaaq, piiaanermilu 60-100-nik sulisoqassalluni.
Aatsitassarsioqatigiiffiup FinnAustip misissuinissamut akuersissut 2014-imi pivaa Moriusallu kangiani 150 kvadratkilometerisut annertutigisumi 2015-imi misissuilluni.
Aatsitassarsioqatigiiffik BlueJay Miningimik kingorna atserneqarpoq.
Piginneqatigiiffik piiaanissamut akuersissumik qinnuteqarnialerami, BlueJay Miningi Ltd-ip akuersissutaataata piginneqaigiiffimmut nutaamut, nunatsimmi najuaqartumut, Dundas Titanium A/S-imut, tunniunnissaa qinnuigisimavaa.
Aatsitassarsiorfissaq Qeqertaasami Stensby Landip kujammut sineriaani, nunaqarfiup inuerunnikup Moriusap eqqaaniippoq. Aatsitassarsiulersinnaanermullu tusarniaaqqaarnerit naammassineqaqqaassapput.
Sioqqat qernertut sissap avatinnguani meterinik qulinik ititigisumiittut qallorneqassapput.
Tassanilu sioqqani saviminissaq titaniumitalik sukuluinnerpaat ilaat nassaassaavoq, taannalu aatsitassarsiortut tunisassiariniarpaat. Savimimisaq qalipaammut qaqortumut pingaarnertut atorneqartarpoq, printerinullu nutaalianut 3D-mik pisagaannut aamma atorneqartarluni.
BlueJayip sukuluinnerpaamik titaanitalimik saviminissamik 400.000 tonsimik pissarsinissani naatsorsuutigaa, taavalu 60-iniit 100-nut amerlatigisunik sulisoqassangalluni.
Arferit akornusersorneqarsinnaasut
Piiaaffissaq 150 kvadratkilometerinik annertutigaaq, aatsitassarsiornerullu avatangiisinut sunniutigisinnaasaatut suliffeqarfiup naatsorsuutigisai tusarniaaqqaarnermut saqqummiussaani atuarneqarsinnaapput.
Piiaaffik, arfiveqarfimmiittumi qilalugaqarfimmiittumilu Pikialasorsuup tungaanut inissisimassaaq.
Piianerullu nalaani umiarsuit assartuissutaasussat arfernut tamakkununnga akornusersuisinnaaneri ilimagineqarmat, tamanna avatangiisinut sunniutaasinnaasut pillugit naliliinissamut ilanngussassatut misissuiffigineqassaaq.
Imarmiut allat timmissallu assigiinngitsut piianermi aamma akornusersorneqarsinnaasut ilimagineqarpoq.
