Pituffimmi sullissiunnaarneq akisuvoq
Aviisi Berlingske nittartakkamini ullumi taama allappoq, ilisimatitsissutigalugulu Greenland Contractorsip sullissinissamut isumaqatigiissut annaasinnaagaa Namminersorlutik Oqartussanut ukioq kingullerli mianersoqquneqarsimasoq.
Iluanaarutit annaaneqarnerisa saniatigut Greenland Holdingimi siulittaasuusimasup Vagn Andersenip aarleraa, amerikamiut suliffeqarfiata Pituffimmi sulisut qallunaat kalaallillu 400-t amerlanersaasa amerikamiunik, Kalaallit Nunaannut akileraarneq ajortunik, taarserneqarnissaat.
- Pisoq Kalaallit Nunaannut ilungersunarpoq. Nunap karsia ukiumut akileraarutinit 200 millionit koruuninik annaasaqartassappat, Nunatta karsiata akileraarutinit isertittagaannit 2 milliardit koruuniusunit 10 procentiisa missaat annaaneqassapput, professor Torben M. Andersen, nunatta aningaasaqarneranut siunnersuisoqatigiinni siulittaasoq, taama oqarpoq.
Aamma atuaruk Pituffimmi kiffartuussinissamik isumaqatigiissutip annaanera inuussutissarsiornermut eqquinerlussaaq
Vagn Andersen 2013-imi septembarip tungaanut Greenland Holdingimi siulittaasuusoq, Greenland Contractorsimilu suli siulersuisuni ilaasortaq, isumaqarpoq Namminersorlutik Oqartussat suliamut soqutiginninngippallaarsimasut.
- Namminersorlutik Oqartussat, Naalakkersuisut siulittaasorisimasaat Aleqa Hammond Naalakkersuisoqarfimmilu pisortaaneq Svend Hardenberg siuttoralugit, soqutigisatik illersorsimanngimmatigik, Pituffimmut isumaqatigiissutip nutaap nunatsinniginnarnissaa sulissutigisimanngimmassuk, tupigusuutigaara, Berlingskemut oqarpoq.
Vagn Andersenip 2013-imi aasakkut arlaleriarluni Naalakkersuisut siulittaasuat suliaq pillugu ataatsimeeqatiginiartarsimagaluarpaa.
Aamma atuaruk Pituffimmi kiffartuussinissamik isumaqatigiissutip annaaneqarnera politikerit ernumanartoqartikkaat
- Aleqa Hammondili ataatsimeeqatiginnikkusussimanngilaq. Namminersorlutik Oqartussaniimmi tapersersorneqarnissara Greenland Contractorsip amerikamiunut isumaqatigiissutiminnik nutarteriniarnerannut pisariaqartissimagaluarpara, Vagn Andersen oqarpoq.
Naalakkersuisoqarfimmi pisortaaneq Svend Hardenberg tamanna akillugu aviisimut oqarpoq, Vagn Andersenip saaffiginnissimaneri ilisimanagit, erseqqissaatigaluguli Greenland Contractorsip pisortat qullersaa, Peter Kofoed, ataatsimeeqatigisimallugu, taassumalu isumaqatigiissummut kikkut neqerooruteqarsinnaassanersut US Air Forcep, amerikamiut sakkutuui timmisartortartut, akuerisaaneraat aarleqqutigisimagaa.
