Pituffimmi kiffartuussinermut isumaqatigiissuteqarnissaq Folketingetimi amerlasuunit taperserneqarpoq
Kalaallit Nunaat pillugu Dansk Folkepartimit oqaaseqartartoq Søren Espersen, Dansk Folkepartiilu, kisimik siunnersuummut aqagu - januaarip 22-ani - Folketingetimi taasissutigineqartussamut nangaassuteqarput. Siunnersuut amerikamiut Pituffimmiinnerannik Kalaallit Nunaat siunissami aningaasatigut suliassatigullu iluaqutissanik pisalernissaanik imaqartoq.
Folketingimut ilaasortaq Johan Lund Olsen Inuit Ataqatigiillu Folketingetimi partiit allat isumaqatiginiarsimavaat, siunnersuutip tamanit tapersersorneqarnissaa anguniarlugu, Dansk Folkepartilu kisimi nangaassuteqarpoq siunnersuummut ima nipilimmut:
Folketingip naalakkersuisut kajumissaarpai (1) Pituffimmi sullissinissamik isumaqatigiissutip danskinit/kalaallinit pigiinnarneqarnissaa qularnaaqqullugu, (2) Amerikamiut Kalaallit Nunaanni sakkutooqanerisa annertunerpaamik Kalaallit Nunaannut iluanaarutaanissaata qularnaarneqarnissaa sulissutigeqqullugu, tamatumunnga ilanngullugit ilinniarfissat, suliffissat akileraarutitigullu isertitassat qularnaarnissaat aamma (3) siunissami piumasaqaatit aalajangiinermilu tunngavissat nalornissutigineqannginnissaat qularnaaqqullugu.
Johan Lund Olsenip nukingiussamik oqallinneq aallarnerlugu Naalagaaffeqatigiinnerup USA-p Pituffimmiinneranut isiginninnerata oqaluttuarisaanerup ingerlanerani qanoq issimanera nassuiarpaa.
Amerikamiullu timmisartuata qaartartunik usisup B-52-ip, brintinik qaartartunik sisamanik usilluni Pituffiup eqqaani nakkarneranit ukiut 47-t qaangiunneranni nunanut allanut ministeri Martin Lidegaard nassuiaavoq. Qanoq siunissami Pituffimmi kalaallit qallunaallu sulisinnaanissaasa ilinniarsinnaanissaasalu, taamaalillunilu Nunatta karsianut isertitsissutaanissaa, qallunaat naalakkersuisuisa qanoq qulakkeersinnaaneraat nassuiaassutigalugu.
Siusinnerusukkut oqaatigeriikkamisut Martin Lidegaardip oqaatigaa suliaq USA-mi qaffasinnerpaamut anngunneqareersimasoq. Aqagulu, sisamanngornermi, USA-p nunanut allanut ministeria John Kerry peqqaarniisaarniaqatigiit Islamisk Stat qunusitsinerlu pillugit oqaloqatigileruniuk Pituffik aamma eqqartorniarlugu. Taassuma saniatigut danskit nunanut allanut ministeriata qularutiginngilaa USA-p Exelis Services pillugu isumaqatigiissutertik eqquutsissagaat. Exelis Services Danmarkimi najugaqartutut allaqqagaluarluni amerikamiut suliffeqarfiutaata Vectrusip pigivaa, taakkulu Pituffimmi kiffartuussinissamut isumaqatigiissuteqarput.
