Pituffimmi eqqakkat pillugit: Isumaqatigiinniutigineqaqqissinnaanngilaq

Pituffiup eqqaani Uummannami eqqakkanik ulorianartunik saliineq pillugu isumaqatigiissut isumaqatigiinniutigineqaqqissanngilaq. Taama danskit avatangiisinut aqutsisoqarfiat nalunaarpoq.
Assi © : KNR/Arkiv
apriilip 17-at 2015 17:59

Kalaallit Nunaat isumaqatigiissummut atsiornikuuvoq, naallu isumaqatigiissummut aallaaviusut allanngorsimagaluartut, pisussaaffileqatigiinneq suli atuuppoq.

Taamaangalu killinneq illuatungiliuttuniit isorineqarpoq.

KNR-imit taamaammat qallunaat avatangiisinut aqutsisoqarfianni pisortamut tullersorti aperaarput, paasisat nutaat takkutereermata isumaqatigiinniutigeqaqqissinnaanersoq:

- Uagut paasinninnerput naapertorlugu isumaqatigiinniutigineqaqqissinnaanngilaq, aamma Namminersorlutik Oqartussanik paaseqatiginninnerput taamaanngilaq. Taakkuami peqatigalugit suliaq naammaasinikuuarput, saliinerlu taamaatillugu, takoreerlugulu saliisoqarsimasoq, tamannalu avatangiisinut isumannaatsumik pisimasoq, danskit avatangiisinut aqutsisoqarfianni pisortamut tullersorti Claus Torp, oqarpoq.

Aamma atuaruk Pituffiup eqqaani Uummannami eqqakkat pillugit ministeri nassuiaateqartariaqarpoq

Allannguutaanavianngitsoq

Partii Naleraq Inuit Ataqatigiillu isorinnillutik suliaq oqaseqarfigisareerpaat.

Tassami eqqakkat ulorianartut qallunaat avatangiisinut aqutsisoqarfiata Namminersorlutillu oqartussat isumaqatigiissutiminni naatsorsuutigisaannit, suliariumannittussarsiornermilu suliassatut allassimasuniit 70-eriaammik annertunerusut qanittukkut paasinarsivoq.

Isumaqatigiissummulli tamanna allannguutaanavianngitsoq,Claus Torp oqarpoq .

- Namminersorlutik Oqartussanuku taama inerniliisut, oqartussaqarfittullu akisussaaffimmik taama tigusisut. Aqutsisoqatigiiusutut uagut taama pineq isumaqataaffigiinnarparput, aaqqiineq avatangiisinut isumannaatsuusutut isigalugu. Aamma taamaappoq inernerusut naatsorsuutigisamik allaanerusuugaluartut, Claus Torp oqarpoq.  

Folketingimi ilaasortaq Inuit Ataqatigiinneersoq Johan Lund Olsen danskit avatangiisinut ministeriat nassuiaaqquaa, Partii Naleqqameersullu Anthon Frederiksenip avatangiisinut naalakkersuisoq kaammattorpaa isumaqatigiinniaqqeqqullugu.

EU-mi malittarisassat patsisigalugit Pitufffiup eqqaani Uumannami eqqakkat nunatsinniit aallarunneqarsinnaangippasittut paasinarsimmat taama isornarnartorsiuipput.

Aamma atuaruk Pituffiup eqqaani eqqakkat ulorianartut nunamut matoorunneqarput

Malittarisassat ilisimaneqarpasinngitsut

Malittarisassalli taamaattut qallunaat avatangiisinut aqutsisoqarfimmiit nunatsinniluunniit oqartussat ilisimaneqarpasinngilaq.

Tassalu taamaappoq, naak EU-mut ilaasortaasoq tassaangaluartoq Danmark, tamaalillunilu naatsorsuutigineqarsinnaasariaqaraluartoq, malittasarisassat isumaqatigiissummut kalluaasut qanoq ittuunerannik aammalu suut periarfissaanerannik Kalaallinut Nunaannut ilisimatitsisussaasoq.

Claus Torpilli sooq malittarisassat ilisimasimanngineritik akisinnaangilaa:

- Sooq ilisimasariaqakkanik peqarsimannginnitsinnut suna peqqutaanersoq naammaginartumik akisinnaanngilanga. Kisianni pissutsit taamani taamaapput, taavalu taama pisoqarpoq, ajornartorsiullu iliiuuseqarfigineqarpoq, Claus Torp oqarpoq, ilanngullugulu oqaatigalugu, malittarisassat eqqakkat ulorianartut aallarunnissaannut aporfiliisut, danskit inuussutissaqarnermut ministereqarfiata akisussaaffeqarfianniittut.

KNR-imit avatangiisinut nunalerinermullu naalakkersuisoq Mala Høy Kuko apriilip qulingiluaanili oqaaseqartinniaraluarpaa, sulili iluatsitsinani.