Pituffik pillugu siunnersuut akuerineqarpoq
Pituffimmi sakkutooqarfimmi kiffartuussinissamik isumaqatigiissut Folketingimi ullumi taasissutigineqarmat 93-it akuersillutik taasipput, akerliusoqarani, 13-illu akuersinatik itigartitsinatillu taaseqataallutik. 73-it inersuarmi najuutinngillat, taakkununnga ilaallutik savalimmiormiut ilaasortaatitaat marluusut.
Taamatut siunersuuteqartoqarneratigut danskit naalakkersuisui peqquneqarput kiffartuussinissamik isumaqatigiissutip danskinit kalaallinillu pigineqaqqilernissaa ilungersuullugu sulissutigineqassasoq.
”Folketingip naalakkersuisut kajumissaarpai (1) Pituffimmi sullissinissamik isumaqatigiissutip danskinit/kalaallinit pigiinnarneqarnissaa qularnaaqqullugu, (2) Amerikamiut Kalaallit Nunaanni sakkutooqanerisa annertunerpaamik Kalaallit Nunaannut iluanaarutaanissaata qularnaarneqarnissaa sulissutigeqqullugu, tamatumunnga ilanngullugit ilinniarfissat, suliffissat akileraarutitigullu isertitassat qularnaarnissaat aamma (3) siunissami piumasaqaatit aalajangiinermilu tunngavissat nalornissutigineqannginnissaat qularnaaqqullugu.”
Aamma atuaruk Pituffimmi kiffartuussinermut isumaqatigiissuteqarnissaq Folketingetimi amerlasuunit taperserneqarpoq
Johan Lund Olsen Inuit Ataqatigiinneersoq siunnersuusiornissamut aqqutissiuisuuvoq, taannalu ullumi pisoq pillugu naammagisimaarinnippoq.
- Inernera iluarisimaarpara. Piffissaq annertooq nukippassuillu atorlugit Folketingimi partiit tamaasa manna pillugu isumaqatigiinniaqatigaakka siunnersuullu suliaralugu. Maannalu iluatsippoq, folketingimut ilaasortaq Johan Lund Olsen oqarpoq nangillunilu.
- Danskit naalakkersuisuinit matuma timitalerneqarnissaa alloriarnerit tullerissavaat.
Aamma atuaruk Pituffiup aalajangiiffigineqartarnera Folketingip danskinut utertikkusukkaa
Aamma atuaruk Olsvigip Lidegaardip Naalakkersuisullu Pituffik pillugu akissuteqarnissaat ujartorpaa
Nunatsinni naalakkersuisut danskillu naalakkersuisuisa suliami qanoq akuusimatiginerat arlaannaanulluunniit attuumassuseqanngitsumik misissuiffigineqassasoq, Johan Lund Olsenip ippassaq pingasunngornermi oqallinnermi aamma piumasaraa.
Inuit Ataqatigiit Siumullu saniatigut siunnersuuteqaqataasut tassaapput Venstre, Socialdemokraatit, De Radikale, SF, Enhedslisten, Liberal Alliance kiisalu De Konservative.
Dansk Folkeparti kisiartaalluni siunnersuuteqaqataanngilaq, partii allamik siunnersuuteqarmat.
Siunnersuutigineqartorli siulleq akuersissutigineqarmat, siunnersuut taanna taamaatiinnarneqarpoq.
Siunnersuut akuerineqartoq ima oqaasertaqarpoq:
”Folketingip naalakkersuisut kajumissaarpai (1) Pituffimmi sullissinissamik isumaqatigiissutip danskinit/kalaallinit pigiinnarneqarnissaa qularnaaqqullugu, (2) Amerikamiut Kalaallit Nunaanni sakkutooqanerisa annertunerpaamik Kalaallit Nunaannut iluanaarutaanissaata qularnaarneqarnissaa sulissutigeqqullugu, tamatumunnga ilanngullugit ilinniarfissat, suliffissat akileraarutitigullu isertitassat qularnaarnissaat aamma (3) siunissami piumasaqaatit aalajangiinermilu tunngavissat nalornissutigineqannginnissaat qularnaaqqullugu.”
