Pituffik pillugu NATO-mut akikillisaasoqartarsimanera ilumuunnginneraraa
Danmarkip NATO-mut ilaasortaanerminut akiliutigisartagaata annikinneruneranut USA-p Pituffimmi sakkutooqarfeqarnera pissutaanngilaq.
2004-mit 2010-mut illersornissamut ministeriusimasoq maannalu Venstrep gruppiani siulittaasuusoq, Søren Gade, KNR-imut taama oqarpoq.
- Taamatut oqallisaanera unitsikkuminaatsuuvoq eqqaaneqartuarlunilu. Ilumoornersoq ilumuunnginnersorluunniit uanga oqaatigissanngilara. Oqaluttuarisaanermik ilisimasallit tamanna oqaatigisariaqarpaat. Ukiunili arfinilinni ministeriunni taamaattoqarneranik tusagaqanngilanga.
Aviisimi oqaatigineqartoq akerlilerpaa
Aviisip NORDJYSKE-p sapaatiummat saqqummersup saqqaani tamanna oqaatigineqaraluarpoq. Allaaserisarmi "Pituffik pillugu akikillisaataasoq nunguttoq" ima aallarnerneqarmat:
“Amerikamiut Kalaallit Nunaata avannaani Pituffimmi sakkutooqarfeqarnerat Danmarkip Natomut akiliinikinnerunissaanut ukiuni qulikkuutaani tunngavilersuutaavoq. Tamannalu tamaanga killeqartariaqarpoq, Venstrep gruppiani siulittaasoq, Søren Gade, illersornissamullu ministeriusimasoq taama isumaqarpoq:
- Tamanna tunngavilersuutigiinnarsinnaanngilarput. Illersoqatigiiffeqarpugut allanit akilersorneqartumik."
Taamatulli issuaavigineqarnini paatsoornermik tunngaveqartoq, Søren Gade isumaqarpoq.
- Tusagassiortoq (NORDJYSKE-meersoq, aaqq.) politikererpassuillu taama isumaqarput. Illersornissamulli ministeriuninni Pituffimmi sakkutooqarfiup akikillisaataasarsimanera tusarsimanngisaannarlugu naqissuserusuppara.
AAMMA ATUARUK Pituffik pillugu ukioq manna 2016-imi suliaq
Pituffimmi kiffartuussinissamik isumaqatigiissutip ukiuni kingullerni assortuussutaasimanera uggoralugu oqaatigaa, USA-llu Nunatsinniinnerata pitsaasutut Nunatsinni isigineqalernissaa neriuutigalugu.
- Pituffik iluaqutissatut Kalaallit Nunaanni amerlanerusunit isigineqartuuppat pitsaassagaluarpoq. Tassalu inuiaqatigiinnik kalaallinik ineriartortitseqataasussasut, suliffissaqartitsillunilumi ilinniarfissaqartitsivoq, Søren Gade oqarpoq.
Aamma illersornissamut ministeriusimasup Socialdemokraatineersup Nick Hækkerupip amerikamiut Pituffimmi sakkutooqarfeqarnerat iluaqutigalugu Danmarkip NATO-mut aningaasartuutikinnerunera ilumuunnginnerarpaa.
NATO-mut akikillisaavigineqartarnermut tunngavilersuutitut kina sunalu najoqqutarinerlugit NORDJYSKE-p oqaatiginngilaa.
NATO-mut missingersuutit naalakkersuisut qaffakkusukkaat
USA-mi præsidentip "America First"-imik politikkeqarnini tunngavigalugu nunat NATO-mut ilaasortaasut illersornissamut missingersuutinut nunami tunisat ataatsimut nalingisa (BNP) ikinnerpaamik 2 procentiinik akiliisarnissaannik piumasaqaateqarnera pissutigalugu sammisaq oqallisaaqqilerpoq.
USA-p nunami tunisat ataatsimut nalingisa 3,6 procentii illersornissamut 2016-imi atorpai, nunanullu Grækenland, Tuluit Nunaat, Estland aamma Polen nunani kisiartaallutik 2 procentimik piumasaqaat sinnerlugu atuisarput, NATO-p allattorsimaffiani tamanna atuarneqarsinnaavoq.
AAMMA ATUARUK USA Pituffimmut akiliuteqassaaq
Danmarkip BNP-mi 1,17 procentiinnaa illersornissamut missingersuutiminut atortarpaa allattorsimaffimmilu normu 17-itut inissisimalluni.
Taakkuli amerlineqartariaqartut Søren Gade isumaqarpoq, naak angujuminaatsissinnaagaluarlugu.
- Europami nunani isumalluutissaqanngilagut. Sorsuttoqarsimagaangat amerikamiut annaakkiartortuarpaatigut. Tamannalu sorsunnersuarmut siullermut aappaanullu nalitsinnilu Kosovomut atuuppoq. Eqqisseqatigiinneq pisussaannartut takorloortarparput. Taamaammat europamiut akiliinerusariaqarnerinik paasitinniarnissaat ajornakusuussasoq isumaqarpunga.
Danmarkimi naalakkersuisooqatigiit toqqammavigisaanni allassimavoq illersornissaq pillugu isumaqatigiissummi ukioq manna isumaqatigiinniutigineqartussami "Illersornissamut qullersaqarfimmut aningaasaliissutaasartut malunnaatilimmik amerlineqarnissaat" danskit naalakkersuisuisa qulakkeerniaraat.