Piterartoqarnerani eqqugaasunut katersuiniartoqalersoq

Anorip miiterimut 70 missaannik sakkortutiginerata illut qalii tingitaatippaat, umiatsiat aqqusinermi takussaapput igalaallu ilaat aseruatitsersimallutik.

Iddimanngiiu Bianco inuit nammineq kajumissutsiminik katersuiniartut internertikkut attaveqaqatigiittaarfiinik aallartisaavoq:

- Pisariaqarsorigakku eqqugaasut ikiorneqarnissaat eqqorneqarneri annertugami. Illut aseruatiterlutik, teqqaasut assigiinngitsullu. Taamaattumik ikiorserneqarnissaat pisariaqartillugu nammineq piumassutsinnik aallartitsivunga ikioqateqarlunga, Iddimanngiiu Bianco oqarpoq.

Aamma atuaruk ASSIT Piteraq Tasiilami ajoqusiingaatsiarpoq

Taassuma Laura Taunajik peqatigalugu katersuiniarnissaq isumassarsiaraa.

Kajumissutsiminnik suleqataarusullutik nalunaartut peqatigalugit katersuiniarnissaq pilersaarusiorneqassaaq. Taamaattumik pilersaarutit suli piareerneqaratik.

- Assigiinngitsunik erinarsorumasunik katersinikuuvugut tusarnaartitsilaarsinnaasunik immaqalu kaageqarluni. Imaluunniit assigiinngitsunik nammineq atorunnaakkanik tunisisinnaaneq imaluunniit aningaasatigut tapiisinnaaneq. Assigiinngitsut takorloorpagut taamaattumik ilusinilluarpat tassuuna begivenhed-ikkut ersarinnerusumik nalunaarumaarpugut.

Misiginneqataaneq katersuiniarusutsitsilersimavoq.

- Immaqa misiginneqataanerulluta. Takorloorsinnaagakku nammineq illoqarluni illup qaava ammarsimavoq qanoq ilungersunarsinnaatigisoq. Pingaartipparalu arlaatigut iliuuseqartoqarnissaa inuinnarniit pisortaniilluunniit, Iddimanngiiu Bianco taama oqarpoq.

Iddimanngiiu Bianco Laura Táunâjik peqatigalu Naalakkersuisunut kaammattuillutik ualeq manna allagaqarput, Tasiilami anorersuarujussuarneranik eqqugaasunik ikiuiniartoqartariaqartoq oqaatigalugu.

Aamma atuaruk Tasiilami piterarnerani ajornartorsiuteqartunut Sermersooq attaviliisoq