PISUT Istanbulimi timmisartoqarfissuarmi saassussineq pillugu ilisimasavut
Tyrkiami illoqarfissuarmi Istanbulimi timmisartoqarfissuaq Atatürk ippassaq marlunngornermi qaartartumeerneqarpoq. Peqqarniisaarniartoqarnerani pisut tamakkiinerusumik ataani allaaseraagut.
Ajunaartut:
* Tyrkiap premierministeriata Binali Yildirumip nalunaarutigaa inuit 36-t toqutaasimasut sulilu amerlanerusut ajoqusersimasut. Ajoqusertut amerlanngitsut inuunerminnik ulorianartorsiortitsinngitsut premierministerip aamma oqaatigaa. Inatsisinik atuutsitsinermut ministerip Bekir Bozdagip oqaatigaa ikiligaasut 147-sut.
* Toqutaasut amerlanersaat tyrkiamiupput, Yldirimili naapertorlugu toqutaasut aamma allamiunik ilaqarsinnaapput.
* Nutaarsiassaqartitsivik Reuters naapertorlugu toqutaasut ilagaat ukrainimiu iranimiorlu. Ukrainemi Iranimilu oqartussat nutaarsiassaqartitsivimmut taama ilisimatitsipput.
* Saudiarabiami nutaarsiassaqartitsiviit ilisimatitsipput saudiarabiamiut arfineq-marluk aqqunartitersimasut ilagigaat. Taakkuli tamarmik ulorianartorsiunngitsut oqaatigineqarpoq.
* Danskit nunanut allanut ministereqarfiata Innuttaasunik kiffartuussivia danskinik ajoqusertoqarsimaneranik paasissutissanik apuussivigineqarsimanngilaq.
Aamma atuaruk Istanbulimi timmisartoqarfissuarmi qaartartumeerisoqarnerani 50-it missaat toqutaasut
Saassussisut:
* Saassussisut pingasuusimassangatinneqarput. Kikkuuneri aammalu peqqarniisaarniaqatigiinnit aalajangersimasuneernersut suli ilisimaneqanngilaq. Premierministerilli Yildirimip oqaatigaa misissuinerugallartut takutikkaat peqqarniisaarniaqatigiit Islamisk Stat saassussinermut akisussaasuusut.
Pisut ingerlarngat:
* Binali Yildirim naapertorlugu imminnut pilliutigitigalutik qaartartumeerisut taxarlutik timmisartoqarfissuarmukarsimapput. Aallaasinik eqqarasuartaatinik inuppassuit akornannut eqqaassipput kingornalu imminnut qaartillutik. Qaartitsinerit katillugit pingasuusut oqaatigineqarpoq.
* Saassussineq, nunatsinni nalunaaqutaq naapertorlugu ualikkut nalunaaqutaq tallimat missaani aallartippoq.
* Takunnittut arlallit tusagassiorfinnut oqaluttuarput eqqaassisoqareersoq paatsiveerunnersuaqarsimasoq.
* Nutaarsiassaqartitsivik CNN naapertorlugu qaartitsinerit timmisartoqarfissuup tikittarfiani pisimapput. Takunnittut aamma oqaluttuarput biilinik inissiisarfimmi aamma eqqaassisoqarsimasoq.
Saassusinerup kingunerisaanik pisut allat:
* Timmisartoqarfissuaq Atatürk saassussinerup kingorna matuneqarpoq. Unnuarli timmisartuussinerit aallarteqqinneqarput, nunallu ataasiakkaat silaannakkut angallannermut oqartussaasuisa Istanbulimi mittarfinnik atuinissamut akuersissanersut suli nalunarallarpoq.
* Københavnip timmisartoqarfissuanit Istanbulimut timmisartuussinerit arlallit ullormut ingerlanneqartarput. Timmisartoqarfissuup nittartagaa naapertorlugu ullumikkut pingasunngornermi timmisartuussinissat taamaatinneqarsimanngillat.
* Tyrkiami saassussinerup kingunerisaanik Københavnip timmisartoqarfissuani angallannikkullu eqiteriffiusuni allani politiit amerlineqarsimapput..
Najoqqutarisat: Reuters, AFP, CNN Türk, cph.dk
/ritzau/