Pissartanngorniuttoqarnerani atugassarititaasut isornartorsiorneqartut
Tekle Ghebrelulip futsalimik nunatsinni ukioq manna pissartanngorniuttoqarnerani unammeqataasut arsarluarnerarlugit ataasinngormat nersualaarpai. Arsarluarneralli Maniitsumi timersortarfissuarmi atugassarititaasut pissutaanngillat, isornartorsiuinera taama nipeqarpoq.
- Timersortarfissuaq mikivallaarpoq, tamanna nalunngereerparput. Timersortarfissuarmi sukat marluupput tassuunalu meterinik marlunnik naappallaarpoq natiluppallaarlunilu.
- Arsaattartut assut naalliuutigaat, Tekle Ghebrelul, N-48-mut finalimi ajorsartoq taama oqarpoq.
AAMMA ATUARUK Nunanut allanut unammisartunut sungiusaasoq GM-ertoqarnerani piginnaanilinnik maluginiagaqartoq
Futsalimik nunatsinni pissartanngorniunnerit ukiut pingasut matuma siorna aamma Maniitsumi ingerlanneqarput. Taamanilu arsaattartut pingasut timersortarfissuarmi atugassarititaasut pissutigalugit seeqqumikkut ajoquserput, Tekle Ghebrelul taama oqaluttuarpoq, GBU-mullu erseqqissumik kaammattuuteqarluni:
- Arsaattartut isumannaallisaanerat eqqarsaatigalugu neriuutigaraa nunatsinni pissartanngorniunnerit siunissami sumi ingerlanneqassanersut GBU-p eqqarsaatigilluarumaaraa.
Pitsaanerusinnaasoq
Maniitsumi atugassarititaasut pitsaanerpaajunngitsut arsaattartut kattuffiannit nassuerutigineqarpoq.
- Timersortarfissuaq silaannaluttupilussuuvoq, kissakkaangallu silaannaq isugutattupilussuanngortarpoq, tamannalu arsaannermut sunniuteqartarluni. Ilaatigut arsartartoqatigiit ilaat pisarnermisut arsarsinnaaneq-ajorput, GBU-mi siulittaasoq, John Thorsen, taama oqarpoq.
Futsalimilli nunatsinni pissartanngorniunnerit Maniitsumi ingerlateqqinneqarsinnaanerat mattutivissorumanngilaa.
- Pissartanngorniunnerit ukiut tamaasa Nuummi ingerlanneqarsinnaanngillat, aamma unammersuarnernut piumasaqaataasut timersortarfiup naammassivai, GBU-p siulittaasua John Thorsen taama oqarpoq, Maniitsullu timersortarfissuani arsaaffiup 40 x 18 meteriunera, piumasaqaataasullu minnerpaamik 25 x 16 meteriunerat innersuussutigalugu.
