Pisut: Pissartanngorniunnerit poorskip nalaani pisut ima naammassineqarput
Maniitsoq aallarniutigissavarput, nunatsinnimi volleyballimik pissartanngorniunnerit, assartuinikkut ajornartorsiuteqangaatsiartoqaraluartoq, tassani ingerlanneqarput. Ukioq manna pissartanngorniuttoqarnerani angutini holdit sisamat arnanilu holdit sisamat taamaallaat peqataapput. Maniitsormiut AVI-meersut angutini pissartanngorput arnanilu nuummiut GSS-imeersut pissartanngorlutik.
Paamiuni assammik arsarlutik pissartanngorniuttut
Nukappissat assammik arsarlutik nunatsinni pissartanngorniunnerat Paamiuni sapaatit-akunnerata naanerani ingerlanneqarpoq. Nuummiut GSS-imeersut Sisimiormiut S-68-imeersut ajugaaffigaat. Pissartanngorniutivinneq 23-25-mik inerneqarpoq. Pissartanngorniunnermi ajuunnerpaaq tassaavoq Norsaq HC-meersoq Karl Brandt. Taanna 52-eriarluni ajuuppoq.
Nerrivimmi arsaararlutik Nuummi unammipput
Nerrivimmi arsaararluni nunatsinni pissartanngorniunnerit Nuummi poorskip nalaani aamma ingerlanneqarput. Unamminerillu hunnorujut arlaliupput. Pingaartumillu unammisut marluk pissartanngorniunnerni takutitsilluarput angusarissaarlutillu.
Ilimagineqareersutut BAT98-imeersoq Ivik Nielsen angutini pissartanngorpoq, arnanilu PNAP 2015-imeersoq Rosa Marie Petersen pissartanngorluni.
Marlukkuutaarluni unamminerni Ivik Nielsen aamma pissartanngoqataavoq. Qatanngunni Aqqalu Nielsen, singlemi pissartanngorniutivinnermi ajorsartitani, marlukkuutaarnermi pissartanngoqatigaa. Arnat marlukkuutaarlutik pissartanngorniunneranni Rosa Marie Petersen aamma pissartaavoq. Bodil Mona Frederiksen pissartanngoqatigalugu.
Utoqqasaanut inuusuttunullu aamma pissartanngorniutitsisoqarpoq. Unamminerit inerneri uani takuneqarsinnaapput.
Sisorarnermik pissartanngorniunnerit Sisimiuni ingerlanneqarput
Nunatsinni snowboardillaqqinnerpaat sisorallaqqinnerpaallu pissartanngorniunnerat, Snowball GM 2017, sapaatit akunnerata naanerani ingerlanneqarpoq. Angutit snowboardimik nunatsinni pissartanngorniummata Jonas Strømsted sapaatit-akunneri marluk ingerlanerini aappassaanik kuultinnappoq. Danmarkimi snowboardimik pissartanngiunnerit poorski sioqqutilaarlugu ingerlanneqarmata aamma kuultinnakkami.
Arnat snowboardimik nunatsinni pissartanngorniunnerini Nanna Lennert kuultinnattuuvoq.
Unammiuaarnermi tassani aamma Freestyle Skimik aamma nunatsinni pissartanngorniuttoqarpoq. Adam Mike Kjeldsen Freestyle Skimi nunatsinni pissartanngorpoq. Snowball GM-imi Sisimiuni ingerlanneqartumi inernerit allat uani takuneqarsinnaapput.
Sulorarluni nunatsinni pissartanngorniunnerit Nuummi ingerlanneqarput
Sulorarluni nunatsinni pissartanngorniunnerit Nuummi poorskip nalaani ingerlanneqarput, B67-imeersullu marluk, Frederik Elsner aamma Jens Frederik Nielsen, singlemi pissartanngorniuvinnermi unammipput Jens Frederik Nielsenilu pissartanngorluni.
AAMMA ATUARUK Volleyballimik GM-ertoqarnerani AVI aamma GSS pissartanngortut
Taakku marlukkuutaarluni pissartanngorniutivinnermi unammeqatigiipput, B67-imeersullu Michael kleist aamma Nikki E. Nathansen unammillugit.
BKN-imeersoq Sara L. Jacobsen arnat singlemi nunatsinni pissartanngorniunnerini kuultinnappoq, pissartanngorniutivinnermi Milka Brønlund ajugaaffigalugu.
Sara L. Jacobsen marlukkuutaarluni pissartanngorniutivinnermi aamma pissartanngoqataavoq, Susanne Wallbohm, aamma BKN-imeersoq, pissartanngoqatigalugu. Pissartanngorniuvitinnermi Milka Brønlund unammeqqippaa, taannali Nina H. Møller peqatigalugu BKN-imiunut ajorsarpoq. Sulorarluni nunatsinni pissartanngorniuttoqarnerani inernerit tamaasa uani takuneqarsinnaapput.
